عمران خان کو تنقید کم کرنے کا مشورہ: فواد چوہدری کا اہم بیان”فوج بھی ہماری ہے، ملک بھی ہمارا ہے۔ ہمیں ذمہ دارانہ سیاست کی طرف لوٹنا ہوگا تاکہ قومی مفادات کا تحفظ ممکن ہو،” فواد چوہدری۔

اسلام آباد (لیہ ٹی وی): تحریک انصاف کے بانی چیئرمین عمران خان کو جیل میں مشورہ دیا گیا کہ وہ فوج اور اس کی قیادت کے ساتھ کشیدگی کم کریں اور افراد پر تنقید کے بجائے قومی مسائل پر توجہ مرکوز کریں۔فواد چوہدری نے پیر کے روز اڈیالہ جیل میں عمران خان سے ملاقات کے بعد کہا کہ پارٹی اور اسٹیبلشمنٹ کے درمیان تعلقات کو بہتر بنانے کی ضرورت ہے تاکہ تحریک انصاف کو سیاسی طور پر مناسب جگہ مل سکے۔ انہوں نے عمران خان سے مطالبہ کیا کہ ان کا بیرون ملک کنٹرول ہونے والا ایکس (سابقہ ٹوئٹر) اکاؤنٹ پاکستان واپس لایا جائے، کیونکہ یہ اکاؤنٹ فوج مخالف مہمات کے لیے استعمال ہو رہا ہے۔فواد چوہدری نے مزید کہا کہ عمران خان اور تحریک انصاف کو معمول کی سیاست میں واپس آنے کے لیے جارحانہ رویہ چھوڑنا ہوگا۔ ان کا کہنا تھا کہ وہ 19 دسمبر کو دوبارہ عمران خان سے ملاقات کرکے ان سے مزید بات کریں گے۔انہوں نے تحریک انصاف کے سوشل میڈیا ایکٹیوسٹس کو تنبیہ کی کہ وہ ملک دشمن پروپیگنڈا کرنے والوں کے آلہ کار نہ بنیں اور فوج مخالف بیانیے سے دور رہیں۔ فواد چوہدری نے زور دیا کہ فوج پاکستان کے تحفظ کی بنیاد ہے اور اس پر تنقید قومی کمزوری کا سبب بنے گی۔تحریک انصاف کی سینیئر قیادت کے مطابق، پارٹی کے سوشل میڈیا پلیٹ فارمز اور عمران خان کا ایکس اکاؤنٹ بیرون ملک سے کنٹرول کیا جا رہا ہے۔ فواد چوہدری کو امید ہے کہ عمران خان ان کے مشورے کو سنجیدگی سے لیں گے تاکہ سیاسی ماحول میں بہتری لائی جا سکے۔