ملتان(نمائندہ لیہ ٹی وی) سیکرٹری زراعت پنجاب افتخار علی سہو نے کہا ہے کہ دھان کی کاشت کے علاقوں میں 22 اینٹی سموگ سکواڈ کا قیا م عمل میں لایا گیا ہے جو نہ صرف کاشتکاروں کو فنی راہنمائی فراہم کر رہے ہیں بلکہ دھان کی باقیات کو آگ لگانے میں ملوث افراد کے خلاف قانونی کاروائی بھی عمل میں لا رہے ہیں۔محکمہ زراعت پنجاب کے اینٹی سموگ سکواڈ24/7متحرک ہیں۔انھوں نے کہا کہ صوبہ پنجاب میں اب تک1125 ایکڑ رقبہ پر دھان کی فصل کو آگ لگائی گئی ہے۔دھان کی باقیات کو آگ لگانے والوں کے خلاف123 ایف آئی آرز کا اندراج عمل میں لایا گیا ہے۔محکمہ زراعت پنجاب کے تحت سموگ رولز کی خلاف ورزی کرنے والوں کو 1 کروڑ 10لاکھ روپے سے زائد جرمانہ عائد کیا گیا ہے۔محکمہ زراعت پنجاب کی اینٹی سموگ سرگرمیوں میں مزید تیزی لائی جا رہی ہے۔ محکمہ زراعت کے تحت گاؤں کی سطح پر سموگ کمیٹیاں فعال ہیں۔ محکمہ زراعت کے تحت سموگ کے نقصانات بارے بھرپور آگاہی مہم جاری ہے۔ سیکرٹری زراعت پنجاب افتخار علی سہونے مزید کہا کہ وزیر اعلیٰ پنجاب سموگ کنٹرول پروگرام کے تحت 5ارب روپے کی لاگت سے 5 ہزار سپر سیڈرز 60فیصد سبسڈی پر کاشتکاروں کو فراہم کئے جا رہے ہیں۔دھان کی باقیات کو سائنسی بنیادوں پر کار آمد بنانے کیلئے سپرسیڈرز کے استعمال بارے کاشتکاروں کو راہنمائی فراہم کی جا رہی ہے۔انھوں نے مزید کہا کہ محکمہ زراعت پنجاب کے تحت دھان کے کاشتکاروں کو جولائی2024 سے اب تک 3لاکھ50 ہزار وارننگ نوٹسز بھی ایشو کئے گئے ہیں۔
