لیہ :حکومت پنجاب کی ہدایات پر محکمہ زراعت پیسٹ وارننگ ضلع لیہ نے گندم کی زہریلی گولیوں (ایلومینیم فاسفائیڈ) کی غیر قانونی خرید و فروخت کے خلاف کارروائیاں تیز کر دی ہیں۔ اس سلسلے میں ضلع بھر میں اب تک خلاف ورزی کے مرتکب عناصر کے خلاف تین مقدمات درج کروائے جا چکے ہیں۔محکمہ زراعت کے افسران کے مطابق ایلومینیم فاسفائیڈ کی خرید و فروخت صرف رجسٹرڈ ڈیلرز کے ذریعے اور مقررہ قانونی تقاضوں کے تحت کی جا سکتی ہے۔ ڈیلرز کے لیے ضروری ہے کہ زہریلی گولیوں کی محفوظ تحویل یقینی بنائیں، خریداروں کی مکمل تفصیلات اور خرید و فروخت کا باقاعدہ ریکارڈ محفوظ رکھیں اور غیر رجسٹرڈ ذرائع سے اس کی خرید و فروخت سے اجتناب کریں۔افسران نے واضح کیا کہ ایلومینیم فاسفائیڈ انتہائی زہریلا کیمیکل ہے اور اس کی غیر ذمہ دارانہ فروخت انسانی جانوں کے لیے خطرناک ثابت ہو سکتی ہے۔ خلاف ورزی کرنے والوں کے خلاف قانونی کارروائیاں جاری رہیں گی۔







