لیہ: ایڈیشنل ڈپٹی کمشنر انفورسمنٹ محمد اویس سرور کی زیر صدارت پرائس کنٹرول مجسٹریٹس کی کارکردگی سے متعلق اجلاس منعقد ہوا، جس میں اشیائے ضروریہ کی قیمتوں، سرکاری نرخ ناموں پر عملدرآمد اور مارکیٹوں میں قیمتوں کی نگرانی کے اقدامات کا جائزہ لیا گیا۔
اجلاس سے خطاب کرتے ہوئے ایڈیشنل ڈپٹی کمشنر انفورسمنٹ محمد اویس سرور نے پرائس کنٹرول مجسٹریٹس کو ہدایت کی کہ وزیراعلیٰ پنجاب مریم نواز شریف کی ہدایات کے مطابق عوام کو ریلیف فراہم کرنے کے لیے پرائس کنٹرول اقدامات مزید مؤثر بنائے جائیں اور دکانوں پر سرکاری نرخ نامے نمایاں جگہوں پر آویزاں کروائے جائیں۔انہوں نے کہا کہ پرائس کنٹرول مجسٹریٹس مارکیٹوں کے باقاعدگی سے معائنے کریں اور اشیائے خوردونوش کی مقررہ نرخوں پر فروخت یقینی بنائیں۔ سرکاری نرخوں سے زائد قیمتیں وصول کرنے والوں کے خلاف قانون کے مطابق کارروائی عمل میں لائی جائے۔اے ڈی سی انفورسمنٹ نے مزید کہا کہ صارفین کے حقوق کا تحفظ اور عوام کو مناسب نرخوں پر اشیائے ضروریہ کی فراہمی یقینی بنانے کے لیے تمام متعلقہ افسران اپنی ذمہ داریاں مستعدی اور مؤثر انداز میں ادا کریں۔
