لیہ: لیہ فٹبال لیگ کے سنسنی خیز گرینڈ فائنل میں آزاد ایف سی لیہ نے پنالٹی ککس پر ایس اے گارڈن فٹبال کلب لاہور کو 4 کے مقابلے میں 5 گول سے شکست دے کر چیمپئن بننے کا اعزاز حاصل کر لیا۔
کمشنر ڈیرہ غازی خان ڈویژن اشفاق احمد چوہدری فائنل دیکھنے کے لیے اسٹیڈیم پہنچے، جہاں ان کی آمد سے کھلاڑیوں اور شائقین کا جوش و خروش مزید بڑھ گیا۔ میچ کے اختتام پر کمشنر نے ونر اور رنر اپ ٹیموں میں ٹرافیاں جبکہ کھلاڑیوں میں میڈلز تقسیم کیے۔
انہوں نے کہا کہ کھیل نوجوانوں میں نظم و ضبط، ٹیم ورک، برداشت اور مقابلے کا جذبہ پیدا کرتے ہیں، جبکہ کھیلوں کے میدان آباد ہونے سے نوجوانوں کو اپنی صلاحیتوں کے اظہار کے مواقع ملتے ہیں اور صحت مند معاشرے کی تشکیل میں مدد ملتی ہے۔
کمشنر نے لیہ فٹبال لیگ کے کامیاب انعقاد کو خوش آئند قرار دیتے ہوئے منتظمین کی کاوشوں کو سراہا اور کھلاڑیوں کی کارکردگی کی تعریف کی۔ انہوں نے کہا کہ ایسے مقابلوں سے مقامی ٹیلنٹ کو آگے بڑھنے اور اپنی صلاحیتیں منوانے کے بہتر مواقع میسر آتے ہیں۔
