بغیر لائسنس اور زائد المعیاد ادویات پر کریک ڈاؤن، 8 کیسز پراسیکیوشن کیلئے بھجوا دیئے ڈسٹرکٹ ڈرگ کوالٹی کنٹرول بورڈ کے اجلاس میں 15 کیسز زیر غور، 3 افراد کو وارننگ جبکہ 4 غیر حاضر؛ اے ڈی سی جی شبیر احمد ڈوگر کی سخت کارروائی کی ہدایت

لیہ(نمائندہ لیہ ٹی وی) ایڈیشنل ڈپٹی کمشنر جنرل شبیر احمد ڈوگر کی زیر صدارت ڈسٹرکٹ ڈرگ کوالٹی کنٹرول بورڈ کا اجلاس کمیٹی روم میں منعقد ہوا۔ اجلاس میں چیف ایگزیکٹو آفیسر ہیلتھ ڈاکٹر شاہد ریاض، ممبر بورڈ ڈاکٹر عبدالعزیز، جنرل سیکرٹری بورڈ عامر شکیل اور متعلقہ ڈرگ انسپکٹرز نے شرکت کی۔ اجلاس کے دوران بغیر ڈرگ لائسنس سیل پرچیز، زائد المعیاد ادویات کی موجودگی اور کوالیفائیڈ پرسن کی غیر موجودگی سے متعلق 15 کیسز بورڈ کے سامنے پیش کئے گئے۔ ڈسٹرکٹ ڈرگ کوالٹی کنٹرول بورڈ نے متفقہ طور پر 8 کیسز پراسیکیوشن کیلئے بھجوا دیئے، 3 افراد کو وارننگ جاری کی گئی جبکہ 4 افراد غیر حاضر پائے گئے۔ ایڈیشنل ڈپٹی کمشنر جنرل شبیر احمد ڈوگر نے ہدایت کی کہ ادویات کی فروخت کے تمام عمل کو قانون کے مطابق یقینی بنایا جائے، بغیر لائسنس ادویات کی خرید و فروخت، زائد المعیاد ادویات کے ذخیرہ اور کوالیفائیڈ پرسن کی عدم موجودگی کسی صورت برداشت نہیں کی جائے گی۔ انہوں نے متعلقہ افسران کو ہدایت کی کہ ڈرگ قوانین کی خلاف ورزی کرنے والوں کے خلاف بلا امتیاز کارروائی جاری رکھی جائے تاکہ عوام کو معیاری اور محفوظ ادویات کی فراہمی یقینی بنائی جا سکے۔