لیہ(نمائندہ لیہ ٹی وی)ڈپٹی کمشنر آصف علی ڈوگر کی زیر صدارت محکمہ سیکرٹری آر ٹی اے کا اجلاس منعقد ہوا۔اجلاس میں ایڈیشنل ڈپٹی کمشنر جنرل/سیکرٹری آر ٹی اے شبیر احمد ڈوگر سمیت متعلقہ افسران نے شرکت کی۔اجلاس میں ٹرانسپورٹ سے متعلقہ امور، کرایہ جات، گاڑیوں کی فٹنس اور اڈوں کی مجموعی صورتحال کا تفصیلی جائزہ لیا گیا۔ڈپٹی کمشنر نے اجلاس سے خطاب کرتے ہوئے کہا کہ وزیر اعلیٰ پنجاب کی ہدایات کے مطابق عوام کو زیادہ سے زیادہ ریلیف کی فراہمی اولین ترجیح ہے اس سلسلہ میں کسی بھی صورت مسافروں سے اضافی کرایہ وصول کرنے کی اجازت نہیں دی جائے گی اوورچارجنگ میں ملوث عناصر کے خلاف بلاامتیاز کارروائی عمل میں لائی جائے اور اس ضمن میں سخت مانیٹرنگ کا نظام وضع کیا جائے۔ڈپٹی کمشنر آصف علی ڈوگر نے سیکرٹری آر ٹی اے کو ہدایت کی کہ ضلع بھر کے تمام بس اڈوں اور ویگن اسٹینڈز کا باقاعدگی سے معائنہ کیا جائے اور وہاں پر مسافروں کو فراہم کی جانے والی سہولیات کو بہتر بنایا جائے۔انہوں نے مزید کہا کہ گاڑیوں کی فٹنس کو یقینی بنانے کے لیے جامع چیکنگ مہم چلائی جائے تاکہ کسی بھی غیر فٹ یا خستہ حال گاڑی کو سڑک پر آنے کی اجازت نہ ہو۔ڈپٹی کمشنر نے مزید کہا کہ کرایہ نامے واضح جگہ آویزاں کیا جائے تاکہ مسافروں کو مقررہ کرایوں سے آگاہی حاصل ہو سکے گاڑیوں میں اوورلوڈنگ ہرگز برداشت نہیں کی جائے گی اور خلاف ورزی کرنے والوں کے خلاف سخت قانونی کارروائی عمل میں لائی جائے گی۔انہوں نے مزید کہا کہ ٹرانسپورٹ کے نظام کو بہتر بنانے اور عوام کو محفوظ، باوقار اور معیاری سفری سہولیات کی فراہمی کے لیے تمام متعلقہ ادارے مربوط انداز میں کام کریں اور اپنی ذمہ داریوں کو احسن طریقے سے نبھائیں تاکہ حکومتی ویژن کے مطابق عوام کو حقیقی ریلیف فراہم کیا جا سکے۔
