لیہ(نمائندہ لیہ ٹی وی)چیئرمین بورڈ آف گورنرز/ڈپٹی کمشنر آصف علی ڈوگر کا ڈی پی ایس بوائز ونگ لیہ کا دورہ، ادارے کے مختلف شعبہ جات کا معائنہ کیا اور انتظامات کو سراہا۔ اس موقع پر نئے تعینات کردہ پرنسپل عثمان رشید نے ڈپٹی کمشنر کو بریفنگ دیتے ہوئے بتایا کہ یکم اپریل 2026 سے چارج سنبھالنے کے بعد ادارے کی بہتری کے لیے اقدامات اٹھائے گئے ہیں جس کے نتیجے میں نمایاں بہتری آئی ہے اور طلبہ کی تعداد 622 سے بڑھ کر 783 ہو چکی ہے جو والدین کے بڑھتے ہوئے اعتماد کا مظہر ہے۔ڈپٹی کمشنر آصف علی ڈوگر نے نئی قیادت میں ادارے کے انتظامات اور تعلیمی اقدامات کو سراہتے ہوئے اطمینان کا اظہار کیا اور کہا کہ شہریوں کے بچوں کے لیے ڈی پی ایس بوائز ونگ لیہ میں محدود نشستوں پر داخلہ جاری ہے لہٰذا والدین اس موقع سے فائدہ اٹھائیں۔ انہوں نے کہا کہ ڈی پی ایس ایک بہترین ریکارڈ کا حامل تعلیمی ادارہ ہے اور بچوں کو زیورِ تعلیم سے آراستہ کرنے اور ان میں لیڈرشپ صلاحیتوں کو نکھارنے کے لیے محنت اور شفقت سے تدریسی سلسلہ جاری رکھا جائے۔دریں اثناء ڈپٹی کمشنر نے ڈی پی ایس میں قائم امتحانی سنٹر کا بھی معائنہ کیا، انتظامات کا جائزہ لیا اور طلبہ کی رول نمبر سلپس، حاضری اور دیگر سہولیات کو چیک کیا۔
