لیہ(نمائندہ لیہ ٹی وی) ضلع لیہ میں انسداد پولیو کی 3 روزہ قومی مہم کا آغاز ہو گیا۔ انسداد پولیو کی 3 روزہ قومی مہم کے دوران ضلع لیہ میں 4 لاکھ 35 ہزار 690 بچوں کو پولیو سے بچاؤ کے قطرے پلانے پلائے جائیں گے۔ ڈپٹی کمشنر آصف علی ڈوگر نے ڈی ایچ کیو ہسپتال کے چلڈرن وارڈ میں بچوں کو پولیو ویکسین کے قطرے پلا کر مہم کا باقاعدہ افتتاح کیا۔ اس موقع پر چیف ایگزیکٹو آفیسر ہیلتھ ڈاکٹر شاہد ریاض،ڈسٹرکٹ ہیلتھ آفیسر ڈاکٹر غلام محی الدین، ہیڈ آف ڈیپارٹمنٹ ڈاکٹر ام سلمیٰ، سینئر چائلڈ سپیشلسٹ ڈاکٹر آصف خان میرانی، صدر فیڈریشن آف پرائیویٹ سکول مہر شفیق تھند، متعلقہ افسران اور میڈیا نمائندگان بھی موجود تھے۔ ضلع بھر میں مہم کے دوران مجموعی طور پر 1797 ٹیمیں حصہ لے رہی ہیں جن میں 78 فکسڈ، 58 ٹرانزٹ پوائنٹ اور 1661 موبائل ٹیمیں شامل ہیں، جبکہ 348 ایریا انچارج مہم کی نگرانی کے فرائض انجام دیں گے۔ ڈپٹی کمشنر آصف علی ڈوگر نے اس موقع پر کہا کہ پولیو مہم کو ہر صورت کامیاب بنایا جائے گا اور اس سلسلے میں مکمل نگرانی کی جائے گی۔ انہوں نے کہا کہ ٹیمیں گھر گھر جا کر پانچ سال تک کی عمر کے بچوں کو پولیو سے بچاؤ کے قطرے پلائیں گی تاکہ ضلع کو پولیو فری بنایا جا سکے۔
