ڈی سی لیہ کا بہادر ڈیجیٹل لائبریری اور واسا دفتر کے تعمیراتی کاموں کا معائنہ ترقیاتی منصوبوں کی رفتار تیز کرنے کی ہدایت، جدید تعلیمی سہولیات کی فراہمی اہم سنگ میل قرار

لیہ(نمائندہ لیہ ٹی وی)ڈپٹی کمشنر لیہ آصف علی ڈوگر نے بہادر ڈیجیٹل لائبریری میں جاری ترقیاتی کاموں کا دورہ کیا اور کام کی رفتار، معیار اور مجموعی پیش رفت کا تفصیلی جائزہ لیا۔ انہوں نے مختلف حصوں کا معائنہ کرتے ہوئے جاری تعمیراتی سرگرمیوں پر اطمینان کا اظہار کیا اور متعلقہ افسران کو ہدایت کی کہ منصوبے کی تکمیل میں مزید تیزی لائی جائے۔ڈپٹی کمشنر نے اس موقع پر کہا کہ بہادر ڈیجیٹل لائبریری ضلع میں جدید تعلیمی سہولیات کی فراہمی کی جانب ایک اہم قدم ہے یہ منصوبہ طلبہ،نوجوانوں اور تحقیق سے وابستہ افراد کے لیے جدید خطوط پر سیکھنے کے مواقع فراہم کرے گا۔ انہوں نے کہا کہ لائبریری کو جدید ٹیکنالوجی سے آراستہ کیا جا رہا ہے تاکہ ڈیجیٹل لرننگ، آن لائن ریسرچ اور علمی سرگرمیوں کو فروغ مل سکے متعلقہ ادارے مقررہ ٹائم لائن کے مطابق کام مکمل کریں تاکہ یہ منصوبہ جلد عوام کے لیے فعال ہو سکے۔بعد ازاں ڈپٹی کمشنر نے واسا کے زیر تعمیر دفتر کا بھی معائنہ کیا اور جاری کام کا جائزہ لیا۔ انہوں نے ہدایت کی کہ دفتر کی تعمیر میں معیار اور رفتار دونوں کو یقینی بنایا جائے تاکہ شہریوں کو نکاسی آب اور فراہمی آب کی بہتر سہولیات بروقت فراہم کی جا سکیں۔انہوں نے کہا کہ واسا کا جدید دفتر شہری مسائل کے حل میں اہم کردار ادا کرے گا اور سروس ڈلیوری کو مزید مؤثر بنائے گا۔اس موقع پر ایکسین بلڈنگ میاں سجاد ہمراہ تھے۔