لیہ ( نمائندہ لیہ ٹی وی)عامر چوک کروڑ روڈ کے قریب ٹریکٹر ٹرالی اور موٹر سائیکل کے درمیان خوفناک تصادم کے نتیجے میں ایک نوجوان جاں بحق جبکہ ایک کم عمر لڑکا شدید زخمی ہو گیا۔تفصیلات کے مطابق عامر چوک کروڑ روڈ کے قریب ٹریکٹر ٹرالی اور موٹر سائیکل کے درمیان اچانک تصادم پیش آیا جس کے نتیجے میں موٹر سائیکل سوار شدید زخمی ہو گئے۔ حادثے کی اطلاع ملتے ہی ریسکیو 1122 کی ٹیم فوری طور پر موقع پر پہنچ گئی اور امدادی کارروائیاں شروع کر دیں۔ریسکیو اہلکاروں نے جاں بحق ہونے والے شخص اور زخمی کو ابتدائی طبی امداد فراہم کرتے ہوئے فوری طور پر قریبی تحصیل ہیڈکوارٹر ہسپتال کروڑ منتقل کر دیا۔ریسکیو ذرائع کے مطابق جاں بحق ہونے والے نوجوان کی شناخت محمد شہزادعمر تقریباً 25 سال سکنہ 107 ٹی ڈی اے کے نام سے ہوئی ہے، جبکہ زخمی ہونے والے کی شناخت احسان اللہ عمر تقریباً 15 سال سکنہ107 ٹی ڈی اےکے طور پر ہوئی ہے۔واقعہ کے بعد علاقہ میں افسوس اور سوگ کی فضا قائم ہو گئی جبکہ پولیس نے حادثہ کی وجوہات جاننے کیلئے مزید کارروائی شروع کر دی ہے۔
