وزیر اعلیٰ پنجاب مریم نواز شریف کے ویژن کے مطابق ضلع لیہ کی 367 مستحق بیوہ، مطلقہ خواتین میں گائیں، بھینسیں تقسیم کر دی گئیں

لیہ(نمائندہ لیہ ٹی وی) وزیر اعلیٰ پنجاب مریم نواز شریف کے ویژن کے مطابق ضلع لیہ کی 367 مستحق بیوہ، مطلقہ خواتین میں گائیں، بھینسیں تقسیم کر دی گئیں۔ اس سلسلہ میں محکمہ لائیو سٹاک کے زیر اہتمام یونیورسٹی آف لیہ حافظ آباد کیمپس میں جانوروں کی تقسیم کی تقریب کا انعقاد کیا گیا۔ تقریب میں ایم پی اے سمعیہ عطاء شہانی، ڈپٹی کمشنر آصف علی ڈوگر ریجنل ڈائریکٹر لائیو سٹاک ڈاکٹر غلام نظام الدین، اے ڈی سی جی شبیر احمد ڈوگر، ایڈیشنل ڈائریکٹر لائیو سٹاک ڈاکٹر طارق گدارہ، کیمپس ڈائریکٹر ڈاکٹر محمد علی، ضلعی صدر مسلم لیگ ن مہر اسلم سمراء، نور محبوب میلوانہ، ڈپٹی ڈائریکٹرز ڈاکٹر محمد کاشف، ڈاکٹر افراہیم، ڈاکٹر عارف اقبال، میڈیا نمائندگان اور دیہی مستحق خواتین کی بڑی تعداد موجود تھی۔ تقریب سے خطاب کرتے ہوئے ایم پی اے سمعیہ عطاء شہانی نے کہا کہ وزیر اعلیٰ پنجاب مریم نواز شریف نے جنوبی پنجاب کی مستحق خواتین کے لئے بڑا پروگرام شروع کیا ہے۔ دو ارب روپے سے جنوبی پنجاب کے 12 اضلاع کی بیوہ مطلقہ اور معاشی کمزور خواتین کو میرٹ پر مفت گائے بھینس دی جا رہی ہیں۔ انہوں نے کہا کہ اس پروگرام کی بدولت خواتین باعزت روزگار کما کر اپنے کنبے کی کفالت کر سکیں گی۔ انہوں نے کہا کہ ہم وزیر اعلیٰ پنجاب مریم نواز شریف کے اس احسن اقدام پر شکر گزار ہیں۔ ڈپٹی کمشنر آصف علی ڈوگر نے تقریب سے خطاب کرتے ہوئے کہا کہ اس پروگرام کے تحت معاشی طور پر کمزور خواتین کو بااختیار بنانے کی عملی کوشش ہے۔ محکمہ لائیو سٹاک پنجاب کے زیر اہتمام "چیف منسٹر لائیو سٹاک ایسٹس پروگرام” کے تحت مستحق بیوہ، مطلقہ اور کم آمدن والی خواتین کو مفت مویشی فراہم کیے جا رہے ہیں۔ انہوں نے کہا کہ اس سکیم کا مقصد خواتین کو اپنے پاؤں پر کھڑا کرنا اور گھریلو سطح پر روزگار کے مواقع پیدا کرنا ہے۔ ضلع لیہ میں اس فیز میں کل 367 مستحق خواتین اس پروگرام سے مستفید ہوں گی۔ جانوروں کی فراہمی سے دیہی معیشت مضبوط ہو گی اور دودھ و گوشت کی پیداوار میں اضافہ ہوگا۔ ڈپٹی کمشنر نے کہا کہ حکومت پنجاب مستحق خواتین کو صرف اثاثہ ہی نہیں بلکہ خود مختاری کا ذریعہ فراہم کر رہی ہے۔ وزیر اعلیٰ پنجاب مریم نواز شریف کے اس پروگرام سے ایک خاتون کے ذریعے ایک گھرانے کو سپورٹ دی جا رہی ہے۔ ریجنل ڈائریکٹر لائیو سٹاک ڈاکٹر غلام نظام الدین نے کہا کہ شفاف قرعہ اندازی/جانچ پڑتال کے بعد آج تحصیل لیہ اور چوبارہ کی 218 مستحق خواتین کا انتخاب کیا گیا ہے جن کو گائے اور بھینس دی جا رہی ہے۔ محکمہ کے زیر اہتمام 6 مارچ کو تحصیل کروڑ لعل عیسن میں 149 خواتین میں لائیو سٹاک ایسٹس تقسیم کئے جائیں گے۔ ایڈیشنل ڈائریکٹر لائیو سٹاک ڈاکٹر طارق گدارہ نے مہمانوں کا شکریہ ادا کیا۔ دریں اثناء ایم پی اے سمعیہ عطاء شہانی اور ڈپٹی کمشنر آصف علی ڈوگر کی موجودگی میں خواتین نے پرچیاں اٹھا کر قرعہ اندازی کی۔ بعد ازاں سمعیہ عطاء شہانی اور ڈپٹی کمشنر آصف علی ڈوگر نے مستحق خواتین میں گائیں اور بھینسیں تقسیم کیں۔