پنجاب ورکر ویلفیئر فنڈ سے 44 لاکھ 65 ہزار روپے مالیت کے بچوں کو ٹیلنٹ سکالرشپ کےچیک تقسیم

لیہ(نمائندہ لیہ ٹی وی)لیبر ڈیپارٹمنٹ کے زیر اہتمام مزدوروں کے بچوں کو ٹیلنٹ سکالرشپ کے چیک جاری کر دئے گئے۔ پنجاب ورکر ویلفیئر فنڈ سے 44 لاکھ 65 ہزار روپے مالیت کے چیک تقسیم کئے گئے۔ مجموعی طور پر 40 مزدوروں کے بچوں میں 51 چیک تقسیم کئے گئے۔اس سلسلہ میں شوگر ملز لیہ میں لیبر ڈیپارٹمنٹ کے زیر اہتمام تقریب کا انعقاد کیا گیا۔ ڈپٹی کمشنر آصف علی ڈوگر نے تقریب میں ٹیلنٹ سکالرشپ کے چیک تقسیم کئے۔اس موقع پر ایڈیشنل ڈپٹی کمشنر جنرل شبیر احمد ڈوگر، ریزیڈنٹ ڈائریکٹر مقصود احمد بھٹی، ڈپٹی جنرل منیجر بشیر احمد، لیبر انسپکٹر محمد افضل، میڈیا نمائندگان اور مزدوروں نے بھی تقریب میں شرکت کی۔ ڈپٹی کمشنر آصف علی ڈوگر نے تقریب سے خطاب کرتے ہوئے کہا کہ یہ اقدام مزدور طبقے کے بچوں کی تعلیمی معاونت اور حوصلہ افزائی کا عملی ثبوت ہے۔ حکومتِ پنجاب وزیر اعلیٰ مریم نواز شریف کی زیر قیادت محنت کش طبقے کی فلاح و بہبود کو اولین ترجیح دے رہی ہے۔ شوگر ملز کے 40 ورکرز کے بچوں کو اس اسکالرشپ سے براہِ راست فائدہ ہوگا۔ انہوں نے کہا کہ تعلیم ہی ترقی کی بنیاد ہے اور ایسے اقدامات سے معاشرے میں مثبت تبدیلی آتی ہے۔ اس سکالر شپ سے پڑھنے والے بچے جنریشن چینج لے کر آئیں گے اور کل انہیں اداروں میں اچھے عہدوں پر خدمات انجام دیں گے۔ وزیر اعلیٰ پنجاب مریم نواز شریف نے ہر طبقہ خصوصاً مزدوروں اور کمزور طبقات کی فلاح کے لیے متعدد پروگرام شروع کئے ہیں جس کے معاشرے پر دور رس اثرات مرتب ہوں گے۔ متعلقہ ادارے شاباش کے مستحق ہیں جنہوں نے اس تقریب کے انعقاد میں تعاون کیا۔ ڈپٹی کمشنر نے امید ظاہر کرتے ہوئے کہا کہ طلبہ محنت اور لگن سے پڑھ کر ملک و قوم کا نام روشن کریں گے۔ تقریب سے ریزیڈنٹ ڈائریکٹر مقصود احمد بھٹی نے خطاب کرتے ہوئے مہمانوں کا شکریہ ادا کرتے ہوئے اپنے بھر پور تعاون کے عزم کا اظہار کیا۔