لیہ(نمائندہ لیہ ٹی وی) وزیر اعلیٰ پنجاب مریم نواز شریف کے وژن ستھرا پنجاب کی جانب ایک اور عملی اقدام۔ ضلع بھر میں اینٹی لٹرنگ( کوڑا کرکٹ سڑکوں پر پھینکنے کے خلاف) مہم چلانے کا فیصلہ۔ اس سلسلہ میں ڈپٹی کمشنر آصف علی ڈوگر کی زیر قیادت اینٹی لٹرنگ آگہی ریلی کا انعقاد کیا گیا۔ آگہی ریلی کشمیر چوک سے ختم نبوت چوک تک نکالی گئی۔ ریلی میں ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنرز زوہیب کریم، کلیم اللہ خان، ایس ڈی ای او پیرا ام حبیبہ، ڈپٹی ڈائریکٹر کالجز ذوالفقار علی حیدری، سی ای او تعلیم ڈاکٹر محمد قیوم خان، محکموں کے سربراہان اور ویسٹ مینجمنٹ کمپنی کے ورکرز نے بڑی تعداد میں شرکت کی۔ ریلی کے شرکاء نے پلے کارڈز اٹھا رکھے تھے جن پر شہر کو صاف رکھنے کے عزم پر مشتمل نعرے درج تھے۔ ڈپٹی کمشنر آصف علی ڈوگر نے ریلی کے اختتام پر میڈیا سے گفتگو کرتے ہوئے کہا کہ وزیر اعلیٰ پنجاب مریم نواز شریف کا ستھرا پنجاب پروگرام بہت بڑا اقدام ہے۔ ستھرا پنجاب پروگرام کو عالمی سطح پر بھی سراہا گیا ہے۔ ستھرا پنجاب پروگرام کے تحت ضلع لیہ میں بھی ایک خطیر رقم خرچ کی جا رہی ہے۔ شہریوں میں صفائی بارے شعور اجاگر کرنے کیلئے آگہی مہم مزید تیز کریں گے۔ انہوں نے کہا کہ تعلیمی اداروں اور کاروباری مراکز میں سیمینار منعقد کروائے جائیں گے اور طلبہ میں سے صفائی کے سفیر مقرر کریں گے۔ ڈپٹی کمشنر نے کہا کہ شہر، گلی محلوں اور سڑکوں پر کوڑا کرکٹ پھینکنے کی حوصلہ شکنی کی جائے گی۔ صاف ماحول صحت مند معاشرے کی ضمانت ہے لہٰذا عوام کوڑا کرکٹ مقررہ مقامات/ ویسٹ بن میں پھینکنے کی عادت اپنائیں۔ ڈپٹی کمشنر نے کہا کہ آگہی مہم کے بعد انفورسمنٹ پالیسی پر عمل درآمد کیا جائے گا۔ گندگی پھیلانے والوں کے خلاف زیرو ٹالرنس پالیسی اپنائی جائے گی اور جرمانے کئے جائیں گے۔
