لیہ میں بیوٹیفیکیشن منصوبے پر تیزی سے کام جاری، پارکوں اور گرین بیلٹس کی بحالی مریم نواز شریف کے وژن پر عملدرآمد، اے ڈی سی جنرل شبیر احمد ڈوگر کا مختلف پارکوں کا تفصیلی دورہ

لیہ(نمائندہ لیہ ٹی وی) وزیر اعلیٰ پنجاب مریم نواز شریف کے وژن کے مطابق بیوٹیفیکیشن آف لیہ کے تحت ضلع لیہ میں گرین بیلٹس اور پارکوں کی بحالی کا عمل جاری ہے۔ ڈپٹی کمشنر آصف علی ڈوگر کی ہدایت پر ایڈیشنل ڈپٹی کمشنر جنرل لیہ شبیر احمد ڈوگر نے لیڈیز پارک، فضل جکھڑ پارک اور جناح پارک میں جاری تزئین و آرائش، بحالی اور بیوٹیفکیشن کے کاموں کا تفصیلی جائزہ لیا۔ اس موقع پر میونسپل کمیٹی اور ضلع کونسل کے متعلقہ افسران نے تزئین و آرائش، صفائی ستھرائی، گرین بیلٹس کی بہتری اور شہری سہولیات کی فراہمی کے حوالے سے اٹھائے جانے والے اقدامات بارے بریفنگ دی۔ ایڈیشنل ڈپٹی کمشنر نے ہدایت کی کہ پارکوں اور گرین بیلٹس کی بحالی، خوبصورتی، شجرکاری اور سہولیات کو مزید بہتر بنانے کے لیے کام کو معیار اور مقررہ مدت کے اندر مکمل کیا جائے تاکہ شہریوں بالخصوص خواتین اور بچوں کو صاف، محفوظ اور خوشگوار ماحول میسر آ سکے۔ دریں اثناء اے ڈی سی جی نے سہولت آن دا گو بازار لیہ مائنر کا دورہ کیا اور کام کی رفتار کا جائزہ لیا۔