لیہ(نمائندہ لیہ ٹی وی) وزیر اعلیٰ پنجاب مریم نواز شریف کے رمضان نگہبان کارڈ کی مستحق افراد کو فراہمی اور رقوم کی ادائیگی کا عمل تیزی سے جاری ہے۔ ڈپٹی کمشنر آصف علی ڈوگر کی ہدایت پر انتظامی افسران کی جانب سے تحصیل کیمپ سائٹ پر کارڈ ایکٹویشن اور رقوم کی ادائیگی کے عمل کی مانیٹرنگ جاری ہے۔ اس سلسلہ میں ایڈیشنل ڈپٹی کمشنر ریونیو لیہ عابدہ فرید نے رمضان نگہبان کارڈز کی تقسیم کے سلسلے میں تحصیل کروڑ لعل عیسن کا دورہ کیا۔ انہوں نے ایگریکلچر آفس میں قائم تحصیل کیمپ سائٹ کا معائنہ کیا اور نگہبان کارڈ کی ایکٹیویشن اور رقوم کی ادائیگی کے عمل کا جائزہ لیا۔ اس موقع پر اسسٹنٹ کمشنر کروڑ لعل عیسن اصغر علی اور زراعت افسر شہباز حسین ان کے ہمراہ تھے۔ اس موقع پر انہوں نے رمضان المبارک کے دوران بینیفیشریز کو کارڈز کی بروقت اور شفاف تقسیم کو یقینی بنانے کے حوالے سے متعلقہ حکام کو جامع ہدایات جاری کیں، تاکہ تمام معاملات شفافیت کے ساتھ انجام پائیں اور مستحقین کو ان کا حق گھر کی دہلیز پر مل سکے۔ دریں اثناء اے ڈی سی آر نے اراضی ریکارڈ سنٹر کروڑ لعل عیسن کا بھی دورہ کیا اور مختلف کاؤنٹرز سے سروسز کی فراہمی کا معائنہ کیا۔ اے ڈی سی آر نے ہدایت کی کہ سینٹر پر صفائی کا خاص خیال رکھا جائے۔ میرٹ پر سائلین کو خدمات فراہم کی جائیں اور تمام ریکارڈ کو درست طریقے سے مرتب کیا جائے۔ اے ڈی سی آر نے زیر تعمیر اسسٹنٹ کمشنر آفس کے کام کا بھی معائنہ کیا۔
