تعلیمی ترقی حکومت پنجاب کی اولین ترجیح ہے: آصف علی ڈوگر، ڈپٹی کمشنر و چیئرمین بورڈ آف گورنرز ڈی پی ایس کا گرلز ونگ میں چھ نئے کلاس رومز کا افتتاح، طالبات کو بہتر تعلیمی ماحول کی فراہمی

لیہ(نمائندہ لیہ ٹی وی )ڈپٹی کمشنر و چیئرمین بورڈ آف گورنرز ڈی پی ایس آصف علی ڈوگر نے ڈسٹرکٹ پبلک سکول گرلز ونگ کے حیدر بلاک میں چھ نئے کلاس رومز کا افتتاح کر دیا۔ اس موقع پر ایڈیشنل ڈپٹی کمشنر جنرل و سیکرٹری بورڈ آف گورنرز شبیر احمد ڈوگر، ڈسٹرکٹ اکاؤنٹس آفیسر سیکنڈ و فنانس سیکرٹری محمد عبدالرحمن، پرنسپل طاہرہ ذوالفقار اور دیگر متعلقہ افسران بھی موجود تھے۔ڈپٹی کمشنر نے اس موقع پر کہا کہ وزیر اعلی پنجاب مریم نواز شریف کی قیادت میں صوبہ بھر میں تعلیمی ترقی کے لئے ٹھوس اور عملی اقدامات اٹھائے جا رہے ہیں۔ انہوں نے کہا کہ حکومت پنجاب بچیوں کی تعلیم کے فروغ پر خصوصی توجہ دے رہی ہے تاکہ انہیں معیاری اور محفوظ تعلیمی ماحول فراہم کیا جا سکے۔ انہوں نے کہا کہ موجودہ حکومت کا ویژن ہے کہ تعلیمی اداروں کے بنیادی ڈھانچے کو مضبوط بنایا جائے اور جدید سہولیات کی فراہمی کو یقینی بنایا جائے۔ڈپٹی کمشنر نے کہا کہ نئے تعمیر ہونے والے کلاس رومز سے طالبات کو کشادہ اور بہتر تعلیمی ماحول میسر آئے گا اس اقدام سے کلاسوں میں رش کم ہوگا، تدریسی عمل مزید موثر ہوگا اور طالبات یکسوئی کے ساتھ تعلیم حاصل کر سکیں گی۔ انہوں نے کہا کہ ضلعی انتظامیہ تعلیمی شعبہ کی بہتری کے لئے بھرپور اقدامات جاری رکھے ہوئے ہے تاکہ آنے والی نسلوں کو معیاری تعلیم کے مواقع فراہم کئے جا سکیں۔اس موقع پر ڈپٹی کمشنر ودیگر نے شجرکاری مہم کے تحت پودے بھی لگائے۔