لیہ (نمائندہ لیہ ٹی وی)سال 2025 ضلع لیہ کے لیے ترقی کے اعتبار سے ایک بھرپور اور نتیجہ خیز سال ثابت ہوا، جس کے دوران مختلف محکموں کے تحت سڑکوں، سرکاری عمارتوں، سیاحت، شہری سہولیات اور سیلاب سے تحفظ کے متعدد منصوبوں پر عملی کام کیا گیا۔ ان ترقیاتی اقدامات کے نتیجے میں نہ صرف ضلع کے انفراسٹرکچر میں نمایاں بہتری آئی بلکہ عوامی سطح پر سہولیات اور معاشی سرگرمیوں میں بھی اضافہ ہوا۔سرکاری ریکارڈ کے مطابق تحصیل لیہ، چوبارہ اور کروڑ میں ایک سال کے دوران رابطہ سڑکوں کی تعمیر و بحالی کے بڑے منصوبے مکمل یا تکمیل کے قریب پہنچے۔ تحصیل چوبارہ میں اڈا حیات والا سے چک 481/TDA تک 5 کلومیٹر میٹلڈ روڈ، چک 125/ML سے چک 127/ML اور چک 122/ML تک 4.5 کلومیٹر لنک روڈ، رفیق آباد سے چک 454/TDA تک 6 کلومیٹر سڑک جبکہ لیہ تا لاہور روڈ (اڈا رفیق آباد تا چوبارہ) 9.20 کلومیٹر کی بحالی شامل ہے، جس سے دیہی علاقوں کی شہری مراکز تک رسائی میں نمایاں آسانی پیدا ہوئی۔دیہی و مقامی انفراسٹرکچر کے تحت یونین کونسل شیر گڑھ، چک نمبر 123/ML میں 2500 فٹ طویل سیمنٹری دیوار تعمیر کی گئی، جس کا مقصد آبادی کو ممکنہ خطرات سے محفوظ بنانا اور مقامی سطح پر بہتری لانا ہے۔ اسی طرح دریائے سندھ کے کٹاؤ سے متاثرہ علاقوں میں بیت مونگر اور ملحقہ آبادیوں کے تحفظ کے لیے حفاظتی اقدامات کیے گئے، جس سے قیمتی اراضی اور آبادیوں کو نقصان سے بچایا گیا۔سال کے دوران سرکاری و عدالتی عمارتوں کے شعبے میں بھی نمایاں پیش رفت ہوئی۔ لیہ سرکٹ ہاؤس کی بحالی، چوبارہ سب ڈویژن میں سول ججز کے لیے کورٹ رومز اور رہائش گاہوں کی تعمیر، ریکارڈ روم، کاپی برانچ، سہولت سنٹر اور نذارت برانچ کے قیام کے ساتھ ساتھ لیہ میں SP اور DSP انویسٹی گیشن دفاتر کی تعمیر پر بھی کام کیا گیا، جس سے عدالتی اور انتظامی امور میں بہتری آئی۔سیاحت کے فروغ کے لیے TDCP ٹورسٹ ریزورٹ چوبارہ کی اپ گریڈیشن اور بہتری کا منصوبہ بھی سال 2025 میں مکمل/نمایاں پیش رفت کا حامل رہا، جس سے مقامی سیاحت کو فروغ ملا اور روزگار کے نئے مواقع پیدا ہوئے۔ اس کے علاوہ پنجاب ڈویلپمنٹ پروگرام کے تحت لیہ شہر میں سیوریج، اسٹورم واٹر ڈرینج، گلیوں اور سڑکوں کی بہتری جیسے میگا منصوبوں پر بھی ایک سال کے دوران خاطر خواہ کام کیا گیا۔ضلعی حکام کے مطابق سال 2025 میں مکمل ہونے والے اور زیرِ تکمیل ترقیاتی منصوبے آنے والے برسوں میں ضلع لیہ کی معاشی، سماجی اور شہری ترقی کے لیے مضبوط بنیاد فراہم کریں گے جبکہ عوامی سطح پر ان منصوبوں کے مثبت اثرات واضح طور پر محسوس کیے جا رہے ہیں۔
