لیہ(نمائندہ لیہ ٹی وی)وزیراعلیٰ پنجاب مریم نواز شریف کا اقلیتی برادری کے لیے ایک اور احسن اقدام۔بین المذاہب ہم آہنگی، رواداری اور بھائی چارے کی ایک اور عملی مثال قائم کر دی گئی۔کرسمس کے پرمسرت موقع پر عیسائی برادری میں 8 لاکھ 85 ہزار روپے مالیت کے چیک تقسیم کر دیے گئے۔ڈپٹی کمشنر لیہ آصف علی ڈوگر نے فی کس پندرہ ہزار روپے کے چیکس تقسیم کیے۔ڈپٹی کمشنر نے اس موقع پر کہا کہ وزیراعلیٰ پنجاب مسیحی برادری کی فلاح و بہبود کو یقینی بنانے کے لیے کوشاں ہیں اقلیتی برادری کے مسائل حل کرنا حکومت پنجاب کی اولین ترجیحات میں شامل ہے کرسمس گرانٹ کی تقسیم عیسائی برادری کی خوشیوں کو دوبالا کرے گی۔انہوں نے مزید کہا کہ عیسائی برادری ہمیشہ ملک کی ترقی، خوشحالی میں شانہ بشانہ کھڑی رہی ہے حکومت پنجاب ان کی خدمات کو قدر کی نگاہ سے دیکھتی ہے کرسمس کے موقع پر مالی معاونت کا یہ اقدام بین المذاہب ہم آہنگی کی عملی مثال ہے۔اس موقع پر عیسائی برادری نے وزیراعلیٰ پنجاب مریم نواز شریف کا شکریہ ادا کرتے ہوئے کہا کہ حکومت پنجاب کے یہ اقدامات اقلیتی برادری کے اعتماد کو مزید مضبوط کر رہے ہیں وزیر اعلی پنجاب نے احساس دلا رہے ہیں کہ وہ اس ملک کے برابر کے شہری ہیں۔اس موقع پر عیسائی برادری کی جانب سے کرسمس کی خوشیوں کے ساتھ امن، محبت اور بھائی چارے کے فروغ کے عزم کا اظہار کیا گیا۔
