لیہ(نمائندہ لیہ ٹی وی)ڈپٹی کمشنر امیرابیدار نے کہا ہے کہ معصوم بچوں کو مستقل معذوری سے بچانے کے لئے پولیو کا خاتمہ ناگزیر ہے۔ مشترکہ کوششوں سے ملک سے پولیو کا مکمل خاتمہ ممکن ہے۔ تمام محکمے پلان کے مطابق 15 دسمبر سے شروع ہونے والی 3 روزہ قومی انسداد پولیو مہم کو کامیاب بنا کر بچوں کو مستقل معذوری سے بچانے میں کردار ادا کریں۔ انہوں نے یہ بات انسداد پولیومہم کے انتظامات کے جائزہ اجلاس کی صدارت کرتے ہوئے کہی۔ اس موقع پر اسسٹنٹ کمشنر لیہ حارث حمید خان، سی ای اوصحت ڈاکٹرشاہدریاض، ڈاکٹرمحمدیونس کلیہ، ڈی ای او گل شیر، ڈبلیوایچ او سے ڈاکٹر گلبدین، لائیو سٹاک سے ڈاکٹر کاشف محبوب، فوکل پرسن علی احمد، شہزادہ محمد، مہر شفیق تھند اور متعلقہ افسران موجود تھے۔ ڈپٹی کمشنر امیرا بیدار نے اجلاس سے خطاب کرتے ہوئے کہا کہ مہم میں 5 سال تک کی عمر کے 4 لاکھ 26 ہزار سے زائد بچوں کو پولیو ویکسین کے 2 قطرے پلانے کا ٹارگٹ ہر صورت مکمل کیا جائے۔ انہوں نے کہا کہ مہم کو کامیاب بنانے کے لئے سول سوسائٹی سے بہتر کوارڈینیشن بنائی جائے اور علماء کرام جمعہ کے خطبات میں پولیو مرض اور اس سے بچاؤ بارے آگہی دیں۔ سی ای او ہیلتھ ڈاکٹر شاہد ریاض نے بتایا کہ انسداد پولیو مہم کے تمام انتظامات مکمل کر لئے گئے ہیں۔ مہم کے دوران 1797 سو سے زائد ٹیمیں خدمات انجام دیں گی ضلع کے 58 ٹرانزٹ پوائنٹس، نشیبی اور تھل کے علاقوں پر خصوصی فوکس ہوگا۔
