اسلامی جمعیت طلبہ لیہ کا شاندار افطار ڈنر، طلبہ کو نظریاتی جدوجہد کا حصہ بننے کی دعوت، نمایاں کارکردگی پر شیلڈز تقسیم

لیہ (نمائندہ لیہ ٹی وی) اسلامی جمعیت طلبہ لیہ کے زیر اہتمام ایک شاندار اور پروقار افطار ڈنر کا انعقاد کیا گیا، جس میں مختلف کالجز اور یونیورسٹیز کے طلبہ سمیت علمی و سماجی شخصیات نے بڑی تعداد میں شرکت کی۔ افطار ڈنر کا مقصد نوجوانوں کو جمعیت کے نظریات اور منشور سے آگاہ کرنا اور انہیں اسلامی اقدار کے فروغ کے لیے متحرک کرنا تھا۔ تقریب کا آغاز تلاوتِ قرآن پاک سے ہوا، جس کے بعد ناظم اسلامی جمعیت طلبہ لیہ شہر محمد وقاص نے خطاب کرتے ہوئے جمعیت کے اغراض و مقاصد پر روشنی ڈالی۔ انہوں نے کہا کہ اسلامی جمعیت طلبہ ایک نظریاتی اور تربیتی تنظیم ہے جو نوجوانوں کو دینی اور تعلیمی لحاظ سے بہترین رہنمائی فراہم کرتی ہے۔ ان کا مزید کہنا تھا کہ طلبہ کو چاہیے کہ وہ خود کو مثبت سرگرمیوں میں مصروف رکھیں اور اپنی تعلیم کے ساتھ ساتھ ملک و ملت کی خدمت میں بھی پیش پیش رہیں۔ افطار ڈنر کی تقریب سے امیر جماعت اسلامی لیہ شہر ڈاکٹر ظفر عالم ظفری نے بھی خطاب کیا۔ انہوں نے اسلامی جمعیت طلبہ کی خدمات کو سراہتے ہوئے کہا کہ یہ تنظیم نوجوانوں کی اخلاقی اور تعلیمی تربیت کے لیے ایک بہترین پلیٹ فارم ہے۔ انہوں نے طلبہ پر زور دیا کہ وہ اپنی زندگیوں کو اسلام کے سنہری اصولوں کے مطابق ڈھالیں اور معاشرے میں مثبت تبدیلی کے لیے اپنا کردار ادا کریں۔ تقریب میں مختلف تعلیمی اداروں کے طلبہ نے اسلامی جمعیت طلبہ کی کاوشوں کو سراہا۔ شرکاء نے کہا کہ ایسی تقریبات نہ صرف دینی و نظریاتی شعور اجاگر کرتی ہیں بلکہ نوجوانوں کو ایک مثبت سمت بھی فراہم کرتی ہیں۔ آخر میں نمایاں کارکردگی دکھانے والے طلبہ میں شیلڈز تقسیم کی گئیں، جس پر شرکاء نے خوشی کا اظہار کیا۔ افطار ڈنر کے اختتام پر ملک و قوم کی سلامتی، ترقی اور استحکام کے لیے خصوصی دعا بھی کی گئی۔