لیہ (لیہ ٹی وی) آئی جی پنجاب ڈاکٹر عثمان انور نے ایم بی بی ایس میں داخلہ حاصل کرنے والے لیہ پولیس کے کانسٹیبل شہزاد عباس کی شاندار حوصلہ افزائی کرتے ہوئے ابتدائی دو سالہ تعلیمی اخراجات کے لیے 5 لاکھ روپے جاری کر دیے ہیں۔ ترجمان پنجاب پولیس کے مطابق آئی جی پنجاب نے شہزاد عباس کو پنجاب میڈیکل کالج میں داخلہ ملنے پر مبارکباد دی اور اس کے روشن مستقبل کے لیے نیک خواہشات کا اظہار کیا۔ آئی جی پنجاب نے کہا کہ پنجاب پولیس اپنے ملازمین اور ان کے بچوں کو اعلیٰ تعلیم اور بہتر مستقبل کے لیے ہر ممکن مالی معاونت فراہم کر رہی ہے۔ انہوں نے بتایا کہ گزشتہ سال پولیس ملازمین کے بچوں کو اسکالرشپس کی مد میں 78 کروڑ روپے سے زائد رقم دی گئی جبکہ مقامی درسگاہوں میں فیسوں میں رعایت اور بیرون ملک تعلیم کے لیے فارن اسکالرشپس بھی فراہم کیے جا رہے ہیں۔ آئی جی پنجاب نے مزید کہا کہ تعلیمی میدان میں نمایاں کارکردگی دکھانے والے نوجوان پنجاب پولیس کا فخر اور دیگر اہلکاروں کے لیے مشعلِ راہ ہیں۔ واضح رہے کہ کانسٹیبل شہزاد عباس نے ایم کیٹ میں 188 اسکور کیا اور مجموعی طور پر 94.68 فیصد نمبر حاصل کیے تھے۔
