لیہ (لیہ ٹی وی) چوک سرور شہید میں مبینہ طور پر پولیس تشدد کے باعث شہری جاں بحق ہو گیا، جس پر ورثاء اور شہریوں نے شدید احتجاج کیا۔ مظاہرین نے لاش سڑک پر رکھ کر ایم ایم روڈ کو بلاک کر دیا، جس سے ٹریفک کی روانی معطل ہو گئی اور گاڑیوں کی لمبی قطاریں لگ گئیں۔ احتجاج کے دوران مظاہرین نے اڈہ ریاض آباد کے مقام پر آگ لگا کر سڑک کو رکاوٹیں کھڑی کرکے بند کر دیا۔ مظاہرین کا کہنا تھا کہ چوک سرور شہید پولیس نے لڑائی کے ملزمان کو پناہ دینے کے بہانے گھروں پر چھاپے مارے، چادر اور چار دیواری کا تقدس پامال کیا اور توڑ پھوڑ کی۔ مظاہرین نے الزام لگایا کہ پولیس نے گھروں میں گھس کر خواتین کو تشدد کا نشانہ بنایا، قیمتی اشیاء کو نقصان پہنچایا اور ایکسپائر آنسو گیس کے شیل بھی پھینکے۔ ان کا کہنا تھا کہ پولیس تشدد سے انجمن تاجران کے صدر یاسر مان جاں بحق ہوئے، جس پر تاجر برادری میں بھی شدید غم و غصہ پایا جاتا ہے۔ مظاہرین نے وزیر اعلیٰ پنجاب مریم نواز اور آئی جی پنجاب سے واقعے کا نوٹس لینے، ذمہ دار پولیس اہلکاروں کے خلاف کارروائی کرنے اور انصاف کی فراہمی کا مطالبہ کیا ہے۔
