اسلام آباد (لیہ ٹی وی) پاکستان تحریک انصاف (پی ٹی آئی) کی حکومت کے ساتھ مذاکرات سے علیحدہ ہونے کی پس پردہ کہانی سامنے آ گئی ہے۔ ذرائع کے مطابق پی ٹی آئی کے رہنما بیرسٹر گوہر خان نے اعلیٰ سطحی ملاقاتوں میں اہم کردار ادا کیا، جن میں بانی پی ٹی آئی کو دوسری ملاقات پر بریفنگ دی گئی۔ یہ ملاقات 190 ملین پاؤنڈ کیس کے فیصلے کے فوری بعد ہوئی۔
مذاکرات کے حوالے سے عمر ایوب اور علی ظفر نے واضح طور پر کہا کہ اس وقت مذاکرات کا کوئی چانس نہیں، جبکہ ذرائع کا کہنا ہے کہ پی ٹی آئی نے اگر آج مذاکرات میں شرکت کی تو حکومت کے پاس ان کے لیے کوئی خاص پیشکش موجود نہیں ہے۔
بانی پی ٹی آئی کا رویہ پس پردہ مذاکرات کے حوالے سے محتاط ہوگیا ہے، جس پر بیرسٹر گوہر خان نے انہیں محتاط رہنے کی درخواست کی۔ ایک اور ملاقات میں بانی پی ٹی آئی نے علی امین گنڈاپور سے کے پی میں کرپشن کے حوالے سے تحفظات کا اظہار کیا اور ان کی سرزنش کی۔ ذرائع نے یہ بھی بتایا کہ بانی پی ٹی آئی نے علی امین گنڈاپور سے استعفیٰ مانگنے کی خبروں کی تردید کی اور انہیں گورننس کے مسائل درست کرنے کی تلقین کی۔
