ملتان (لیہ ٹی وی) سیریز کے دوسرے اور آخری ٹیسٹ میچ میں پاکستانی بولرز کی شاندار کارکردگی کے باعث ویسٹ انڈیز کی پوری ٹیم پہلی اننگ میں 163 رنز پر ڈھیر ہوگئی۔ پاکستان کی اننگ جاری ہے۔
ویسٹ انڈیز نے ٹاس جیت کر پہلے بیٹنگ کا فیصلہ کیا لیکن پاکستانی بولرز نے ابتدا سے ہی حاوی رہتے ہوئے جلد وکٹیں حاصل کر لیں۔ ڈیبیو کرنے والے کاشف علی نے اپنے پہلے اوور میں مکائل لوئیس کو صرف 4 رنز پر آؤٹ کیا۔
نعمان علی نے اپنی شاندار بولنگ سے ویسٹ انڈیز کی بیٹنگ لائن کو مشکلات میں ڈال دیا اور میچ میں 6 وکٹیں حاصل کیں، جن میں ایک ہیٹ ٹرک بھی شامل ہے۔ ساجد خان نے 2 جبکہ کاشف علی اور ابرار احمد نے ایک ایک وکٹ حاصل کی۔
ویسٹ انڈیز کے 7 بلے باز ڈبل فیگر میں داخل نہ ہو سکے، جن میں سے 4 صفر پر آؤٹ ہوئے۔ مہمان ٹیم نے مجموعی طور پر 41.1 اوورز میں اپنی اننگ مکمل کی۔
پاکستان نے اننگ کا آغاز شان مسعود اور محمد ہریرہ سے کیا لیکن بیٹنگ لائن مشکلات کا شکار رہی۔ 51 رنز پر چار وکٹیں گرنے کے بعد سعود شکیل اور محمد رضوان نے ٹیم کو سہارا دیا۔ سعود شکیل 32 رنز بنا کر آؤٹ ہوئے جبکہ محمد رضوان کریز پر موجود ہیں۔
پاکستان ٹیم نے اس میچ کے لیے ایک تبدیلی کی، خرم شہزاد کی جگہ نوجوان فاسٹ بولر کاشف علی کو فائنل الیون میں شامل کیا گیا۔
واضح رہے کہ سیریز کے پہلے ٹیسٹ میچ میں پاکستان فتح حاصل کر چکا ہے، اور اس میچ میں فتح کے ذریعے سیریز اپنے نام کرنے کے لیے پُرعزم ہے۔
