لیہ(نمائندہ لیہ ٹی وی)وزیر اعلیٰ پنجاب مریم نواز شریف کے ویژن گڈ گورننس کی جانب بڑا قدم۔ عوام کو ضلعی ہیڈ کوارٹر کی بجائے یونین کونسل سطح پر خدمات کی فراہمی کا فیصلہ۔ ڈپٹی کمشنر امیرا بیدار نے ضلع میں یونین کونسلز کو ماڈل یونین کونسل بنانے کا ٹاسک سونپ دیا۔ ماڈل یونین کونسل میں طلبہ، صحت، صفائی، زراعت، لائیو سٹاک، نئی آبادی، سرکاری و پرائیوٹ بلڈنگز، سڑکوں، امن عامہ اور بنیادی سہولیات بارے مکمل معلومات اور مسائل کے موقع پر حل کے لئے اقدامات شامل ہوں گے۔ اس سلسلہ میں ڈپٹی کمشنر امیرا بیدار کی زیر صدارت انتظامات کا جائزہ اجلاس منعقد ہوا۔ اجلاس میں ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنرز حارث حمید خان، ثنا اللہ ہنجرا، نور محمد، ڈپٹی ڈائریکٹر لوکل گورنمنٹ عبد الصمد، ڈپٹی ڈائریکٹر زراعت عاشق حسین، ڈپٹی ڈائریکٹر پاپولیشن ذیشان عارف، ایم ایس ڈی ایچ کیو ڈاکٹر غلام محی الدین، انچارج سیکورٹی برانچ انسپکٹرمحمد طارق، نائب تحصیلدار اویس گرمانی اور متعلقہ افسران موجود تھے۔ ڈپٹی کمشنر امیرا بیدار نے اجلاس سے خطاب کرتے ہوئے کہا کہ گڈ گورننس، شفافیت اور پبلک سروس ڈیلوری کے لئے ابتدائی طور پر ایک یونین کونسل کو ماڈل بنایا جائے گا اور اس سلسلہ کو بتدریج بڑھایا جائے گا۔ انہوں نے کہا کہ ہر یونین کونسل میں ڈیٹا بیس بنایا جائے جہاں روزنامچہ کی طرز پر تمام معلومات درج کی جائیں۔ انہوں نے ہدایت کی کہ عوام کو گھر کی دہلیز پر خدمات کی فراہمی ہمارا فرض ہے اور متعلقہ محکموں کے افسران کمفرٹ زون سے نکل کر فیلڈ میں دستیاب رہیں
