لاہور (لیہ ٹی وی) وزیر اعلیٰ پنجاب مریم نوازشریف کی زیر صدارت خصوصی اجلاس میں لاکھوں خاندانوں کے لیے نگہبان رمضان پیکج دینے کا اصولی فیصلہ کیا گیا ہے۔ اجلاس میں پیکج کے لیے رجسٹریشن کی تاریخ 15 فروری تک مکمل کرانے کی ہدایت دی گئی ہے۔
مریم نوازشریف نے کہا کہ نگہبان رمضان پیکج نادار لوگوں کا حق ہے اور حکومت کا فرض ہے کہ عوام کو ان کا حق عزت و احترام کے ساتھ فراہم کرے۔ وزیر اعلیٰ نے پیکج کی شفافیت کے لیے ضروری اقدامات کرنے کا حکم بھی دیا۔
انہوں نے مزید کہا کہ رمضان المبارک میں عوام کی خدمت اللہ تعالیٰ کی رضا کے لیے کی جائے گی، اور عوام کا لائنوں میں لگنا بالکل بھی پسند نہیں کیا جائے گا۔
اجلاس میں نگہبان رمضان پیکج کے لیے مختلف تجاویز اور سفارشات کا جائزہ لیا گیا۔ پیکج کے لیے رجسٹریشن پی ایس ای آر کے پورٹل pser.punjab.gov.pk پر کی جا سکتی ہے، اور یونین کونسل یا بلدیہ دفاتر میں بھی رجسٹریشن کی جا سکتی ہے۔ اس کے علاوہ ہیلپ لائن 080002345 بھی قائم کر دی گئی ہے تاکہ عوام کو سہولت فراہم کی جا سکے۔
