کراچی(لیہ ٹی وی)سندھ ہائی کورٹ کے آئینی بینچ نے ریٹائرڈ ملازم کے واجبات کی عدم ادائیگی کے کیس میں ٹاؤن میونسپل کمشنر بلدیہ محمد عارف کے وارنٹ گرفتاری جاری کر دیے۔ عدالت نے حکم دیا کہ اگر وہ 28 جنوری تک پیش نہ ہوں تو انہیں گرفتار کر کے عدالت میں پیش کیا جائے۔
جسٹس کے کے آغا نے کیس کی سماعت کے دوران ٹاؤن میونسپل کمشنر کی غیر حاضری پر سخت برہمی کا اظہار کرتے ہوئے کہا کہ عدالتی احکامات کی تعمیل میں تاخیر کسی صورت برداشت نہیں کی جائے گی۔
ٹاؤن میونسپل کارپوریشن کے وکیل نے مؤقف اپنایا کہ ریٹائرڈ ملازم محمد سعید کی پنشن روک دی گئی ہے اور ان کا تعلق ٹاؤن میونسپل کارپوریشن سے نہیں بلکہ کے ایم سی سے ہے، جو پنشن دینے کی ذمہ دار ہے۔
عدالت نے ہدایت کی کہ دونوں محکمے اپنے مسائل حل کر کے رپورٹ پیش کریں۔ دورانِ سماعت وکیل نے یقین دہانی کرائی کہ آئندہ سماعت پر محمد عارف عدالت میں پیش ہو جائیں گے۔ تاہم عدالت نے واضح کیا کہ اگر وہ پیش نہ ہوئے تو عدالتی حکم کی تعمیل کے لیے گرفتاری کے احکامات نافذ کیے جائیں گے۔
