لیہ(نمائندہ لیہ ٹی وی)ضلع لیہ میں انصاف کی فراہمی کو یقینی بنانے کے لیے روزانہ کی بنیاد پر شہریوں کی شنوائی کا سلسلہ جاری ہے۔ ڈی پی او محمد علی وسیم نے دفتر پولیس میں مختلف شہریوں کے مسائل سنے، جن میں اللہ یار، محمد اشرف، غلام مرتضیٰ، ہاشم اور رضو مائی شامل تھے۔ شہریوں نے شکایات کے حوالے سے پولیس سے مدد کی درخواست کی۔ اللہ یار نے الزام عائد کیا کہ بعض افراد نے اسلحہ کے زور پر ان کی کم عمر بیٹی کا زبردستی نکاح کرایا ہے اور ان کی جان کو خطرہ ہے، جس پر ڈی پی او نے متعلقہ پولیس افسران کو فوری کارروائی کی ہدایت کی۔ اسی طرح، رضو مائی نے کہا کہ ان کے خلاف ذاتی رنجش کی بنا پر درخواست دائر کی گئی ہے اور انکوائری کرنے کی درخواست کی۔ محمد اشرف نے بھی اپنی درخواستوں کے بارے میں ڈی پی او سے شکایات کیں۔ڈی پی او محمد علی وسیم نے شہریوں کی درخواستوں پر کارروائی کے لیے ایس ایچ او صدر، ایس ایچ او فتح پور اور انچارج کمپلینٹ سیل کو انکوائری افسر مقرر کر دیا۔ اسی دوران، ڈی پی او محمد علی وسیم نے سرکل چوبارہ کے تھانہ جات کا سرپرائز وزٹ بھی کیا۔ انہوں نے تھانہ چوک اعظم اور تھانہ چوبارہ کے مختلف حصوں کا جائزہ لیا اور فرنٹ ڈیسک پر ریکارڈ کی تکمیل، حوالات، بلڈنگ کی حالت اور دیگر پولیس امور کی تفصیلی جانچ کی۔ پینڈنگ درخواستوں اور مینیول ریکارڈ کی تکمیل کا بھی جائزہ لیا گیا۔ ڈی پی او نے تھانہ کی بلڈنگ کی مینٹیننس، ضروری مرمت اور صفائی کی اہمیت پر زور دیا۔اس موقع پر ڈی ایس پی چوبارہ محبوب احمد، ایس ایچ اوز تھانہ جات و دیگر پولیس افسران بھی ان کے ہمراہ تھے۔ ڈی پی او محمد علی وسیم نے کہا کہ پولیس افسران کی کارکردگی کو بہتر بنانے اور استعداد کار میں اضافے کے لیے سرپرائز وزٹس کا سلسلہ جاری رکھا جائے گا تاکہ سروس ڈلیوری میں مزید بہتری لائی جا سکے۔ہماری کوشش ہے کہ پولیس کے تمام افسران اور اہلکار عوام کے مسائل کے فوری حل کے لیے بھرپور محنت کریں، اور عوام کو انصاف کی فراہمی میں کسی قسم کی غفلت نہ ہو۔
