ملتان(لیہ ٹی وی)چیئر مین مستقبل پاکستان انجینئر ندیم ممتاز قریشی نے انسداد بد عنوانی کے عالمی دن پر قوم کے نام اپنے خصوصی پیغام میں کہا کہ کرپشن کا بڑھتا ہوا ناسور ملکی جڑوں کو کھوکھلا اور معاشی تباہی کا باعث بن رہا ہے،پاکستان کا شمار نا صرف کرپٹ ممالک کی فہرست میں ہورہا ہے بلکہ سالانہ اربوں روپے کرپشن نذر ہورہے ہیں،حکومت بڑھتی ہوئی بدعنوانی پر قابو پانے کی بجائے زبانی کلامی باتوں کے سہارے آگے بڑھ رہی ہے جس کی وجہ سے کرپٹ عناصر کی حوصلہ افزائی اور عوام کے معاشی استحصال کا سلسلہ کم ہونے کی بجائے مسلسل بڑھتا جارہا ہے،مستقبل پاکستان نے کرپشن کے مرتکب افراد کی سزا بطور سزائے موت تجویز کررکھی ہے اگر حکومت اس پر عملدرآمد کرائے تو کرپشن کے ساتھ ساتھ ملک سے بدعنوان عناصر کا خاتمہ بھی ممکن ہوپائے گا۔انہوں نے کہا کہ کرپشن کی وجہ سے ترقیاتی وسائل کا صحیح استعمال نہیں ہو پاتا، جس سے عدم مساوات بڑھتی ہے اور عوامی خدمات کی فراہمی متاثر ہوتی ہے اس کا نتیجہ حکومت اور شہریوں کے درمیان اعتماد کے فقدان کی صورت میں نکلتا ہے۔انہوں نے مزید کہا کہ بدعنوانی کسی بھی ملک کی معیشت اور سماجی ڈھانچے کے لیے ایک گھناؤنا چیلنج ہوتا ہے کیونکہ یہ قوموں کو ان کی صلاحیتوں سے محروم کر دیتی ہے اور عوام کو مساوی مواقع اور منصفانہ حکمرانی کے فوائد سے محروم رکھتی ہے۔انجینئر ندیم ممتاز قریشی نے کہا کہ ملک میں بڑھتی ہوئی کرپشن کے خاتمے کے لئے حکومت کے ساتھ ملک کے ہر ایک فرد کو اپنا اپنا کردار ادا کرنا ہوگا اگر تمام سٹیک ہولڈرز متحد ہوکر آگے بڑھیں گے تو تب ہی اس کا خاتمہ ممکن ہوگا ورنہ اسی طرح بڑھتی رہے گی۔
