ریونیو اہداف کے حصول کیلئے اقدامات میں تیزی لانے کی ہدایت اے ڈی سی آر عابدہ فرید کی زیر صدارت اجلاس، پلس پراجیکٹ کے تحت ونڈہ جات اور میوٹیشن مسائل کے حل کا جائزہ

لیہ(نمائندہ لیہ ٹی وی) ایڈیشنل ڈپٹی کمشنر ریونیو عابدہ فرید کی زیر صدارت پلس پراجیکٹ و ریونیو اہداف کا جائزہ اجلاس کمیٹی روم میں منعقد ہوا۔ اجلاس میں ضلع بھر سے ریونیو افسران نے شرکت کی۔ اجلاس کے دوران پلس پراجیکٹ کے تحت ونڈہ جات اور کھیوٹ میوٹیشن سے متعلق درپیش مسائل کے حل کے لئے اٹھائے جانے والے اقدامات کا جائزہ لیا گیا۔ اے ڈی سی آر عابدہ فرید نے اس موقع افسران کی مجموعی اور انفرادی کارکردگی کا بھی جائزہ لیا اور مقررہ اہداف کے حصول کو یقینی بنانے کی ہدایات جاری کیں۔ انہوں نے متعلقہ افسران کو ہدایت کی کہ ریونیو اہداف کے بروقت حصول اور عوام کو بہتر سہولیات کی فراہمی کے لیے اقدامات میں مزید تیزی لائی جائے۔ انہوں نے زور دیا کہ پلس پراجیکٹ کے تحت ریونیو ریکارڈ کی درستگی اور بروقت تکمیل کو یقینی بنایا جائے تاکہ عوام کو درپیش مسائل کا فوری ازالہ ممکن ہو سکے۔