لیہ( نمائندہ لیہ ٹی وی)ڈپٹی کمشنر اصف علی ڈوگر کی زیر صدارت وزیراعلیٰ پنجاب کے پی آئیز سے متعلق جائزہ اجلاس منعقد ہوا۔اجلاس میں اے ڈی سی جی شبیر احمد ڈوگر،اسسٹنٹ کمشنر زوہیب کریم و دیگر متعلقہ افسران موجود تھے ۔ڈپٹی کمشنر نے اجلاس سے خطاب کرتے ہوئے کہا کہ وزیراعلیٰ پنجاب کے طے کردہ انڈیکیٹرز حکومت پنجاب کی ترجیحات کا عملی مظہر ہیں جن پر بروقت اور مؤثر عملدرآمد ہر محکمے کی اولین ذمہ داری ہے۔ ڈپٹی کمشنر نے ہدایت کی کہ صفائی کے نظام کو مزید بہتر بنایا جائے اور شہری علاقوں کے ساتھ دیہی علاقوں میں بھی صفائی کے انتظامات کو مؤثر بنایا جائے تاکہ عوام کو صاف ستھرا ماحول فراہم کیا جا سکے۔انہوں نے کہا کہ ہسپتالوں اور تعلیمی اداروں میں سہولیات کی فراہمی، حاضری اور سروس ڈیلیوری پر خصوصی توجہ دی جائے بنیادی سہولیات میں کسی قسم کی کوتاہی برداشت نہیں کی جائے گی۔اجلاس میں پرائس کنٹرول مجسٹریٹس کی کارکردگی کا تفصیلی جائزہ لیا گیا۔ ڈپٹی کمشنر نے اس موقع پر کہا کہ پرائس کنٹرول حکومت پنجاب کی اہم ترجیح ہے اور اس میں کسی قسم کی غفلت برداشت نہیں کی جائے گی۔ انہوں نے کہا کہ شہریوں کو مقررہ نرخوں پر اشیائے خوردونوش کی فراہمی ہر صورت یقینی بنائی جائے۔ ڈپٹی کمشنر نے ہدایت کی کہ پرائس کنٹرول مجسٹریٹس فیلڈ میں اپنی موجودگی مزید بڑھائیں روزانہ کی بنیاد پر مارکیٹ چیکنگ کریں ریٹ لسٹس آویزاں کروائیں اور گرانفروشی میں ملوث افراد کے خلاف بلاامتیاز کارروائی عمل میں لائیں۔ انہوں نے واضح کیا کہ آئندہ دنوں میں پرائس کنٹرول کے حوالے سے کارکردگی کو مزید سختی سے مانیٹر کیا جائے گا اور کوتاہی کے مرتکب افسران کے خلاف کارروائی کی جائے گی
