لیہ(نمائندہ لیہ ٹی وی)ایڈیشنل ڈپٹی کمشنر جنرل شبیر احمدڈوگر کی زیرصدارت تعلیمی اداروں، شاپنگ مالز اور بازاروں وغیرہ میں کوڑادان رکھنے بارے اجلاس منعقدہوا ۔اے ڈی سی جی شبیر احمدڈوگر نے اجلاس سے خطاب کرتے ہوئے کہاکہ حکومت پنجاب ماحولیاتی آلودگی سے نمٹنے کے لئے بھرپور اقدامات کر رہی ہے اور اسی سلسلے میں تمام سرکاری دفاتر، تعلیمی اداروں، شاپنگ مالز، تجارتی مراکز اور بازاروں میں رنگ دار کوڑے دان رکھنا لازمی قرار دیا گیا ہے۔ انہوں نے کہا کہ حکومت پنجاب کے جاری کردہ حکم نامے کے مطابق کچرے کو الگ الگ رکھنے کے لئے ہر ادارے میں پیلے رنگ کے ڈبوں میں کاغذ اور ردی، سبز ڈبوں میں بوتلیں اور کانچ کا سامان، سرمئی ڈبوں میں پھلوں کے چھلکے اور ضائع شدہ کھانا، لال ڈبوں میں دھاتی کچرا جبکہ نارنجی رنگ کے ڈبوں میں پلاسٹک ویسٹ جمع کیا جائے گا تاکہ کچرے کو دوبارہ قابل استعمال بنانے اور ماحول دوست نظام کو فروغ دینے میں آسانی ہو۔ اے ڈی سی جی شبیر احمد ڈوگر نے کہا کہ یہ اقدام صفائی کے عالمی معیار کے مطابق شہروں کو بہتر بنانے کی طرف اہم قدم ہے اور رنگ دار کوڑے دان نہ رکھنے کی صورت میں ماحولیاتی تحفظ ایجنسی قانون کے مطابق کارروائی کرے گی۔ انہوں نے متعلقہ محکموں کو ہدایت کی کہ ہدایات پر فوری عمل درآمد یقینی بنایا جائے۔ اس موقع پر اسسٹنٹ ڈائریکٹرماحولیات محمدارشد چغتائی نے بریفنگ دی۔
