لیہ میں تحریک منہاج القرآن کے زیر اہتمام 7 روزہ دروسِ عرفان القرآن کا روح پرور آغاز

لیہ (نمائندہ لیہ ٹی وی) تحریک منہاج القرآن کے زیر اہتمام جناح پارک لیہ میں سات روزہ دروسِ عرفان القرآن کا روح پرور آغاز کر دیا گیا۔ ابتدائی نشست میں معروف سکالر علامہ قمر عباس دھول نے خطاب کرتے ہوئے اقامتِ دین کی اہمیت پر روشنی ڈالی۔ اپنے خطاب میں علامہ قمر عباس دھول نے کہا کہ دین اسلام ایک مکمل ضابطہ حیات ہے، جو ہر طبقے کے لیے مکمل رہنمائی فراہم کرتا ہے۔ انہوں نے کہا کہ قرآن پاک اور سیرتِ طیبہ پر عمل پیرا ہو کر ہی مسلمان دنیا و آخرت میں کامیابی حاصل کر سکتے ہیں۔ دین اسلام کی سربلندی اور اقامتِ دین کے لیے مسلمانوں کو تمام شیطانی فتنوں اور معاشرتی برائیوں کے خلاف جدوجہد جاری رکھنی چاہیے۔ انہوں نے قرآن فہمی کی اہمیت پر زور دیتے ہوئے کہا کہ یہ نہ صرف ہدایت کا ذریعہ ہے بلکہ انسان کی زندگی میں انقلاب برپا کرنے کی بھی صلاحیت رکھتا ہے۔ درس میں بڑی تعداد میں مرد و خواتین نے شرکت کی اور گہرے روحانی اثرات محسوس کیے۔ یہ سلسلہ مزید چھ دن جاری رہے گا، جس میں مختلف جید علماء کرام ایمان افروز خطابات کریں گے۔ عوام الناس سے اپیل کی گئی ہے کہ وہ زیادہ سے زیادہ تعداد میں شرکت کر کے قرآن کی حقیقی تعلیمات سے فیض یاب ہوں۔ دوسرے روز بعد از نماز فجر، معروف مذہبی سکالر علامہ وقاص شاہد قادری جناح پارک لیہ میں ایمان افروز خطاب فرمائیں گے۔