لیہ(نمائندہ لیہ ٹی وی)ایڈیشنل ڈپٹی کمشنر ریونیومحمدشاہدملک کی زیرصدارت پرائس کنٹرول مجسٹریٹس کی کارکردگی کا جائزہ اجلاس منعقدہوا ۔اجلاس میں اسسٹنٹ کمشنرز نور محمد،ثناءاللہ ہنجراودیگرموجودتھے۔اے ڈی سی آر محمدشاہد ملک نے اجلاس سے خطاب کرتے ہوئے کہاکہ رمضان المبار ک میں صارفین کو گراں فروشی ،ذخیرہ اندوزی سے بچانے کے لیے پرائس کنٹرول مجسٹریٹس مارکیٹوں میں چیکنگ کا سلسلہ جاری رکھیں تاکہ حقیقی بنیادوں پرریلیف مہیاکیاجاسکے۔انہو ں نے کہاکہ مارکیٹوں ،پھل ،سبزیوں ،کریانہ ایٹم کی طلب ورسد کی مقررہ کردہ ریٹ پر فروختگی وفراہمی کو یقینی بنایاجائے حکومت پنجاب کی ہدایت پر قیمتوں میں کمی اور استحکام کے لئے اسسٹنٹ کمشنرز اور پرائس مجسٹریٹس روزانہ کی بنیاد پر مارکیٹ میں اشیائے خودونوش کی قیمتوں کی چیکنگ کریں اورمنڈیوں میں روزانہ کی بنیاد پر سبزیوں اور پھلوں کی آکشن کی نگرانی کریں بلاوجہ کسی پرجرمانے عائد کرنا ہرگز مقصود نہیں ہے مگر گراں فروشوں، ذخیرہ اندوزوں اور ناجائز منافع خوروں کی سختی سے جانچ پڑتال کی جائے۔انہوں نے کہاکہ عام بازاروں اور مارکیٹوں میں اشیاءضروریہ کی ریٹ لسٹ اور ریٹ بورڈ کو نمایاں جگہوں پر آویزاں کروائیںاور جو دکاندار اس پر عملدرآمد نہ کرے اس کے خلاف بلاامتیاز کارروائی عمل میںلائی جائے۔اس موقع پرپرائس کنٹرول مجسٹریٹس کی کارکردگی بارے بریفنگ دی گئی۔
