پاک فوج کی ہیلی کاپٹر سروس سے گریس ویلی میں طبی سہولتوں کا آغاز، مقامی افراد کو فوری امداد فراہم

مظفرآباد (لیہ ٹی وی) پاک فوج کے تعاون سے گریس ویلی میں ہیلی کاپٹر سروسز کے ذریعے طبی سہولتوں کا آغاز کر دیا گیا ہے، تاکہ برفباری کے باعث زمینی رابطہ منقطع ہونے والے علاقے میں مقامی افراد کو صحت کی خدمات فراہم کی جا سکیں۔
گریس ویلی میں برفباری کے سبب زمینی راستے بند ہو گئے تھے، جس کے نتیجے میں مقامی افراد شدید طبی مسائل کا شکار ہو گئے تھے۔ پاک فوج نے فوری طور پر ہیلی کاپٹر سروس فراہم کر کے مریضوں اور مقامی افراد کو نکالنے کا عمل شروع کیا۔
7 ڈاکٹروں پر مشتمل ایک ٹیم کو مظفرآباد سے ہیلی کاپٹر کے ذریعے ہلمت منتقل کیا گیا، جہاں یہ ٹیم ہلمت اور تاؤبٹ کے علاقوں میں مقامی افراد کو ضروری طبی امداد فراہم کرے گی۔ ہنگامی حالات میں مریضوں کو فوری طور پر کیل اور مظفرآباد منتقل کیا گیا۔
سرداری میں فری میڈیکل کیمپ میں 153 مریضوں کا معائنہ کیا گیا اور انہیں مفت ادویات فراہم کی گئیں۔ پاک فوج اور سول انتظامیہ نے کیل سے تاؤبٹ تک سڑک کھولنے کے لیے کام شروع کر دیا ہے۔
25 کلومیٹر لمبی سڑک، جو برفباری کے بعد بند ہو گئی تھی، ہلمت تک کھول دی گئی ہے۔ گریس ویلی کے عوام نے پاک فوج اور آزاد کشمیر حکومت کی جانب سے فراہم کی جانے والی ہیلی کاپٹر سروس کو سراہا ہے۔