لیہ (نمائندہ لیہ ٹی وی) ڈی پی او محمد علی وسیم نے ماہ دسمبر 2024 کی پولیس کارکردگی پر پریس بریفنگ دیتے ہوئے بتایا کہ لیہ پولیس نے جرائم پیشہ عناصر کے خلاف بڑی کارروائیاں کیں اور 3 کروڑ 20 لاکھ روپے سے زائد مال مسروقہ برآمد کیا۔ پریس بریفنگ کے دوران ڈی پی او نے کہا کہ پولیس نے 07 خطرناک کرمنل گینگ کے 25 ملزمان سمیت 98 افراد کو گرفتار کیا، جن کے خلاف مختلف وارداتوں جیسے ڈکیتی، رابری اور دیگر جرائم میں ملوث ہونے کے الزامات ہیں۔ برآمد ہونے والے مال مسروقہ میں ایک ٹرک، 22 موٹر سائیکل، 40 مویشی، سولر موٹرز، سولر پلیٹس، انورٹرز، پیٹر انجن، لیپ ٹاپ، زیورات، موبائل فونز اور دیگر اشیاء شامل ہیں۔ ڈی پی او نے بتایا کہ ان ملزمان کے خلاف 176 سے زائد مقدمات درج ہیں اور ان کا مقصد ضلع میں امن قائم کرنا ہے۔ انہوں نے مزید کہا کہ برآمدہ مال مسروقہ کو اصل مالکان کے حوالے کیا گیا۔ محمد علی وسیم نے کہا کہ شہریوں کے جان و مال کی حفاظت کے لیے پولیس نے ہر ممکن اقدامات کیے ہیں اور ضلع کو امن کا گہوارہ بنانے کے لیے کوئی کسر اٹھا نہ رکھی جائے گی۔ پریس بریفنگ کے دوران پولیس افسران، میڈیا نمائندگان، مدعیان اور شہریوں کی بڑی تعداد موجود تھی۔ شہریوں نے ڈی پی او محمد علی وسیم اور لیہ پولیس کی شاندار کارکردگی پر انہیں خراج تحسین پیش کیا۔
