واشنگٹن(لیہ ٹی وی)ڈونلڈ ٹرمپ نے امریکا کے 47ویں صدر کی حیثیت سے اپنی دوسری مدت کا حلف اٹھا لیا۔ تقریبِ حلف برداری یو ایس کیپیٹل روٹونڈا میں منعقد ہوئی، جس میں کئی اہم ملکی و غیر ملکی شخصیات نے شرکت کی۔
ڈونلڈ ٹرمپ تقریب میں اپنی اہلیہ میلانیا ٹرمپ کے ہمراہ پہنچے۔ تقریب میں سبکدوش صدر جو بائیڈن، تین سابق صدور براک اوباما، جارج ڈبلیو بش، اور بل کلنٹن بھی موجود تھے۔
تقریب میں ایلون مسک، جیف بیزوس اور گوگل کے سی ای او سندر پچائی سمیت کئی دیگر بڑی کاروباری شخصیات نے بھی شرکت کی۔ امریکی سپریم کورٹ کے چیف جسٹس جان رابرٹس نے ڈونلڈ ٹرمپ سے حلف لیا، جو 1861ء میں صدر ابراہم لنکن کے حلف میں استعمال ہونے والی بائبل پر لیا گیا۔ ٹرمپ نے اپنی والدہ کی دی ہوئی بائبل پر بھی حلف اٹھایا۔
ڈونلڈ ٹرمپ سے قبل نائب صدر جے ڈی وینس نے اپنی اہلیہ اوشا وینس کے ہمراہ حلف اٹھایا۔ حلف سے قبل ٹرمپ نے چرچ میں دعائیہ تقریب میں شرکت کی۔
واشنگٹن ڈی سی میں سخت سردی کے باعث 40 سال بعد یہ تقریب ان ڈور منعقد ہوئی۔ حلف برداری کے بعد ٹرمپ نے توپوں کی سلامی لی اور قوم سے خطاب کا اعلان کیا۔ مزید برآں، انہوں نے فوری طور پر نافذ العمل صدارتی احکامات پر دستخط بھی کیے۔
واضح رہے کہ امریکی آئین کے مطابق صدر حلف لیتے ہوئے وفاداری، آئین کے تحفظ، اور دفاع کا عہد کرتا ہے۔
