اے این ایف کی کاروائیاں،9ملزمان گرفتار،78کلوگرام منشیات برآمد

راولپنڈی: اینٹی نارکوٹکس فورس نے منشیات سمگلنگ کے خلاف 8 کارروائیوں میں 7,504,000 روپے مالیت کی 78 کلو گرام منشیات برآمدکرکے 9 ملزمان کو گرفتارکرلیا اے این ایف ہیڈکوارٹر راولپنڈی سے جاری گزشتہ 24 گھنٹوں کے انسداد منشیات آپریشنز کی تفصیلات کے مطابق اسلام آباد ایئرپورٹ پر سعودیہ اور بحرین جانے والے 2 مسافروں سے 2.8 کلو گرام آئس برآمد کی گئی ۔ایم ون اسلام آباد کے قریب دو مختلف کارروائیوں میں 40.8 کلو گرام چرس اور 2.4 کلوگرام افیون برآمدکرکے دو ملزمان گرفتارکیے گئے ۔شاہراہ شاہ والی کراچی کے قریب دو ملزمان سے 14.4 کلو گرام چرس برآمدکی گئی ۔ لاہور میں ساتو کاٹلہ گائوں میں موٹر سائیکل سوار سے 8.4 کلو گرام چرس برآمد کی گئی، اسلام آباد کے سیکٹر جی 15 میں ملزم سے 6 کلو گرام چرس اور 1.2 کلو گرام افیون برآمد کی گئی ۔سیالکوٹ میں ملزم سے 2.2 کلو گرام چرس برآمد کی گئی ۔ترجمان اے این ایف نے بتایاکہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔