اسلام آباد (نمائندہ لیہ ٹی وی) انسدادِ دہشت گردی کی عدالت نے وزیرِ اعلیٰ خیبر پختون خوا، علی امین گنڈاپور کے ناقابلِ ضمانت وارنٹِ گرفتاری معطل کر دیے۔ یہ وارنٹ حسن ابدال میں درج ایک مقدمے کے سلسلے میں جاری کیے گئے تھے۔ علی امین گنڈاپور کے وکیل محمد فیصل ملک نے عدالت میں درخواست دائر کی جس میں کہا گیا کہ پشاور ہائی کورٹ نے ان کے موکل کی تمام مقدمات میں ضمانت منظور کی ہے۔وکیل نے پشاور ہائی کورٹ کا حکم نامہ بھی عدالت میں پیش کیا جس پر عدالت نے وارنٹِ گرفتاری معطل کرتے ہوئے علی امین گنڈاپور کو اشتہاری قرار دینے کی کارروائی بھی منسوخ کر دی۔
