اسلام آباد(لیہ ٹی وی)جمعیت علماء اسلام (جے یو آئی-ف) کے سربراہ مولانا فضل الرحمان نے کہا ہے کہ اگر بانی پی ٹی آئی ملاقات کرنا چاہیں تو بھی فیصلہ سوچ سمجھ کر کریں گے۔ اسلام آباد میں عیادت کے لیے آئے صحافیوں سے غیر رسمی گفتگو میں مولانا فضل الرحمان نے بتایا کہ بانی پی ٹی آئی کی جانب سے ملاقات کے لیے کوئی باضابطہ پیغام نہیں ملا۔ انہوں نے کہا کہ وفاق میں پی ٹی آئی کے ساتھ ورکنگ ریلیشن ہے، لیکن صوبائی معاملات پر ہمارا اپنا موقف ہے۔ مولانا نے 2024ء کے عام انتخابات پر گلہ کرتے ہوئے کہا کہ ہمیں لیول پلینگ فیلڈ نہیں دی گئی اور انتخابات میں کچھ لوگوں کو استعمال کیا گیا۔ انہوں نے مزید کہا کہ 26ویں ترمیم میں ہم نے شخصیت کی بجائے اداروں کی مضبوطی کو مقدم رکھا۔ خیبرپختونخواہ کی صورتحال پر تبصرہ کرتے ہوئے مولانا فضل الرحمان نے کہا کہ وہاں حکومت کی رٹ کہیں نظر نہیں آتی، جبکہ ڈی آئی خان، بنوں اور ٹانک دہشت گروں کے حوالے ہو چکے ہیں۔ انہوں نے کہا کہ مدارس کی رجسٹریشن کے طے شدہ معاملات کو بلاوجہ چھیڑا گیا، تاہم یہ مسئلہ خوش اسلوبی سے حل ہو رہا ہے۔ مولانا نے مزید کہا کہ ٹانک سے عدالتیں اور سرکاری دفاتر بھی ڈی آئی خان منتقل ہو چکے ہیں، جو تشویشناک ہے۔
