ملتان (لیہ ٹی وی)پاکستان بلائنڈ کرکٹ کونسل کے زیر اہتمام ڈرنگ اسٹیڈیم بہاولپور میں آج سے بلائنڈ کرکٹ سپر لیگ کا شاندار آغاز کر کردیا گیا ہے۔ایڈیشنل چیف سیکرٹری ساوتھ پنجاب فواد ہاشم ربانی نے کرکٹ بیٹ سے شاٹ لگا کر سپر لیگ کا افتتاح کیا
۔صدر بہاولپور کرکٹ کلب فار بلائنڈ عثمان سعید اور سیکرٹری جنرل سید سلمان طارق بخاری،سپیشل سیکرٹری سی اینڈ ڈبلیو جنوبی پنجاب آفتاب پیرزادہ، ڈویژنل سپورٹس آفیسر عامر حمید اور ڈسٹرکٹ سپورٹس آفیسر فواد انور بھی ان کے ہمراہ تھے۔ ایڈیشنل چیف سیکرٹری ساوتھ پنجاب فواد ہوشم ربانی نے افتتاحی تقریب سے خطاب کرتے ہوئے کہا کہ صلاحیتوں کے حوالے سے خصوصی افراد کسی سے کم نہیں ہیں اور اس طرح کے ایونٹس سے خصوصی افراد کی مہارتیں اور ٹیلنٹ سامنے آتا ہے۔انہوں نے بتایا کہ سپورٹس صرف ایک تفریح نہیں بلکہ اس سے ہمیں اتحاد،دوستی اور صبر کا سبق ملتا ہے اور کھیل کھلاڑیوں کو مختلف چیلینجز کا سامنے کرنے کا گُر سکھاتے ہیں۔
فواد ہاشم ربانی نے کہا کہ وہ تمام کھلاڑیوں کی محنت، عزم اور لگن کی داد دیتے ہیں اور نابینا افراد کے اس کھیل سے یہ ثابت ہوتا ہےکہ اگر محنت کی جائے تو کوئی کام مشکل نہیں ہے۔ انہوں نے کہا کہ پاکستان بلائنڈ کرکٹ ٹیم نے مختلف ٹائٹل جیت کر پوری دنیا میں وطن کا نام روشن کیا جو کہ قابل فخر کارنامہ ہے۔ ایڈیشنل چیف سیکرٹری نے بتایا کہ بلائنڈ کرکٹ کی پروموشن کے لئےجنوبی پنجاب سیکرٹریٹ ہر ممکن تعاون جاری رکھے گا اور جنوبی پنجاب میں منعقد ہونیوالے بلائنڈ کرکٹ ورلڈ کپ کے انعقاد میں بھی بھرپور تعاون کیا جائے گا
۔صدر بہاولپور کرکٹ کلب فار بلائنڈ عثمان سعید نے کہا کہ بلائنڈ کرکٹ سپر لیگ بلائنڈ کرکٹ ورلڈ کپ کی تیاریوں کا حصہ ہے۔پنجاب، سندھ، خیبر پختون خواہ اور بلوچستان صوبہ کی چار ٹیمیں سپر لیگ میں حصہ لے رہی ہیں۔سیکرٹری جنرل کرکٹ کلب فار بلائنڈ سلمان بخاری نے بتایا کہ سپر لیگ میں دنیا کے مایہ ناز بالر اور بیٹس مین شریک ہیں
۔بلائنڈ کرکٹ کے صدارتی ایوارڈ یافتہ مسعود جان بھی بطور کوچ لیگ میں حصہ لے رہے ہیں۔انہوں نے بتایا کہ سپرلیگ ایک ہفتہ جاری رہے گی اور فائنل 28 اکتوبر کو کھیلا جائے گا۔
ایڈیشنل چیف سیکرٹری کو یادگاری شیلڈ بھی پیش کی گئی ۔قبل ازیں ایڈیشنل چیف سیکرٹری سے چاروں صوبوں کی ٹیموں کے کھلاڑیوں کا تعارف بھی کرایا گیا۔
