لیہ: ضلع کے نشیبی علاقوں میں دریائی کٹاؤ کی روک تھام کے لئے اقدامات تیز۔ ہیڈ ریگولیٹری لالہ کریک سے ملحقہ علاقوں، موضع علیانی، بستی حسن خان، واڑہ گشکوری میں حفاظتی سٹرکچر کی سکیم متعلقہ حکام کو بھجوا دی گئی ہے۔ یہ بات دریائی کٹاؤ کے جائزہ کے لئے منعقدہ ویڈیو لنک اجلاس میں بتائی گئی۔ ویڈیو لنک اجلاس میں ڈی جی پی ڈی ایم اے سیف انور جپہ، ڈپٹی کمشنر لیہ آصف علی ڈوگر، چیف انجینئر انہار سرگودھا ریجن صداقت لطیف اور پراجیکٹ ڈائریکٹر لیہ تونسہ پل نے شرکت کی۔ اجلاس میں دریائے سندھ میں جاری کٹاؤ کی صورتحال اور حفاظتی اقدامات کا تفصیلی جائزہ لیا گیا۔ اجلاس میں بتایا گیا کہ سمرا نشیب میں دریائی کٹاؤ کی روک تھام کے لیے وافر مقدار میں میٹریل موقع پر پہنچایا جا رہا ہے تاکہ متاثرہ علاقوں کے تحفظ کے لیے فوری اقدامات کو یقینی بنایا جا سکے۔ اجلاس میں بستی کنجال کے بالمقابل دریا میں بننے والے بیلے میں کیونٹ لگانے کے اقدامات کا بھی جائزہ لیا گیا۔ بتایا گیا کہ کیونٹ کے ذریعے دریا کے بہاؤ کا رخ تبدیل کرنے کے امکانات کا جائزہ لیا جا رہا ہے تاکہ دریائی کٹاؤ کو کم کرتے ہوئے قریبی آبادیوں اور قیمتی اراضی کو محفوظ بنایا جا سکے۔ اجلاس میں بتایا گیا کہ لیہ تونسہ پل کے گائیڈ بند اور اپروچ روڈ کے ٹینڈر جاری کر دئے گئے ہیں جبکہ ضلعی انتظامیہ، محکمہ انہار اور این ایچ اے حکام جلد موقع کا مشترکہ وزٹ کریں گے۔ ویڈیو لنک اجلاس میں ایڈیشنل ڈپٹی کمشنر ہیڈ کوارٹر اویس سرور اور ایکسیئن انہار حفیظ احمد بھی موجود تھے۔
