لیہ: اسسٹنٹ کمشنر لیہ/سیکرٹری آر ٹی اے رانا زوہیب کریم کی زیر صدارت ٹرانسپورٹرز کا اجلاس منعقد ہوا۔اجلاس میں پبلک ٹرانسپورٹ میں غیر قانونی ایل پی جی سلنڈرز کے استعمال اور غیر قانونی اڈہ جات کے خلاف کارروائی سے متعلق امور کا جائزہ لیا گیا۔اجلاس میں ٹرانسپورٹرز کو حکومتی احکامات پر سختی سے عملدرآمد یقینی بنانے کی ہدایات جاری کی گئیں۔اسسٹنٹ کمشنر رانا زوہیب کریم نے کہا کہ مسافروں کی جان و مال کا تحفظ اولین ترجیح ہے پبلک ٹرانسپورٹ گاڑیوں میں غیر قانونی ایل پی جی سلنڈرز کے استعمال کو ہرگز برداشت نہیں کیا جائے گا۔ انہوں نے ٹرانسپورٹرز کو ہدایت کی کہ گاڑیوں سے غیر قانونی سلنڈرز فوری طور پر ہٹائے جائیں اور حفاظتی تقاضوں کو ہر صورت ملحوظ خاطر رکھا جائے۔انہوں نے مزید کہا کہ غیر قانونی اڈہ جات کے خلاف بھی مؤثر کارروائی عمل میں لائی جائے گی اور کسی کو غیر قانونی طور پر ٹرانسپورٹ اڈہ چلانے کی اجازت نہیں دی جائے گی۔ متعلقہ افسران باقاعدگی سے چیکنگ کریں اور خلاف ورزی کی صورت میں قانون کے مطابق کارروائی یقینی بنائیں۔
