لیہ: وزیر اعلیٰ پنجاب مریم نواز شریف کے وژن ’’کرپشن فری پنجاب‘‘ کے تحت ضلعی انتظامیہ کی جانب سے گڈ گورننس، شفافیت اور میرٹ کے فروغ کے لیے اقدامات جاری ہیں۔ اس سلسلہ میں ڈپٹی کمشنر آصف علی ڈوگر کی زیر صدارت ضلعی محکموں کے افسران کا اجلاس منعقد ہوا۔ اجلاس میں ایڈیشنل ڈپٹی کمشنر ریونیو عابدہ فرید، ایڈیشنل ڈپٹی کمشنر ہیڈکوارٹر اویس سرور سمیت ضلعی محکموں کے افسران نے شرکت کی۔ اس موقع پر ڈپٹی کمشنر آصف علی ڈوگر نے کہا کہ گڈ گورننس، شفافیت، میرٹ کے فروغ اور بدعنوانی کے خاتمہ کے لیے مشترکہ اور انفرادی سطح پر مؤثر کوششوں کی ضرورت ہے۔ سرکاری امور کی انجام دہی میں میرٹ اور قانون کی پاسداری کو ہر صورت یقینی بنایا جائے۔ انہوں نے افسران کو ہدایت کی کہ عوامی شکایات کے ازالہ، سرکاری امور میں شفافیت اور شہریوں کو بہتر سروسز کی فراہمی پر خصوصی توجہ دی جائے۔ انہوں نے کہا کہ سرکاری محکموں میں کرپشن اور اختیارات کے ناجائز استعمال کے خلاف زیرو ٹالرنس پالیسی پر عملدرآمد یقینی بنایا جائے۔ ڈپٹی کمشنر نے مزید کہا کہ تمام افسران اپنے اپنے محکموں میں شفاف نظام کو فروغ دیں اور عوام کو ریلیف کی فراہمی میں کسی قسم کی غفلت یا کوتاہی برداشت نہیں کی جائے گی۔
