مظفر آباد: پاکستان مسلم لیگ (ن) کے قائد نواز شریف نے آزاد کشمیر کے انتخابی جلسے سے خطاب کرتے ہوئے کہا ہے کہ عوام نے اعتماد کا اظہار کیا تو آزاد کشمیر کی ترقی کے لیے بڑے پیمانے پر اقدامات کیے جائیں گے۔ انہوں نے کہا کہ آزاد کشمیر، گلگت بلتستان اور ملک کے تمام علاقوں کی یکساں ترقی ان کی ترجیحات میں شامل ہے۔
مظفر آباد میں جلسے سے خطاب کرتے ہوئے نواز شریف نے کہا کہ انہیں کافی عرصے بعد آزاد کشمیر کے عوام سے براہ راست ملاقات کا موقع ملا ہے۔ انہوں نے خطے کے ساتھ اپنی دیرینہ وابستگی کا اظہار کرتے ہوئے کہا کہ یہاں جدید انفراسٹرکچر، بہتر سفری سہولیات اور بنیادی خدمات کی فراہمی کے لیے عملی اقدامات کیے جائیں گے۔
انہوں نے مظفر آباد میں موٹروے طرز کے منصوبوں کی ضرورت پر زور دیتے ہوئے کہا کہ دریائے جہلم کے کنارے جدید شاہراہ کی تعمیر سے نہ صرف آمدورفت بہتر ہوگی بلکہ سیاحت کو بھی فروغ ملے گا۔
مسلم لیگ (ن) کے قائد نے اعلان کیا کہ مظفر آباد کے لیے آئندہ چند روز میں 10 گرین بسیں فراہم کی جائیں گی جبکہ آزاد کشمیر کے مختلف علاقوں میں طبی سہولیات کی بہتری کے لیے 15 موبائل ہسپتال بھی بھیجے جائیں گے۔
نواز شریف نے کہا کہ اگر عوام نے دوبارہ موقع دیا تو آزاد کشمیر کے مسائل کے حل کے لیے عملی اقدامات کیے جائیں گے اور وہ ہر تین ماہ بعد آزاد کشمیر کا دورہ کر کے ترقیاتی منصوبوں کا جائزہ لیں گے۔
