لَیَّہ : کمشنر ڈی جی خان ڈویژن اشفاق احمد چوہدری نے مریم نواز ہیلتھ کلینک سمرا نشیب کا اچانک معائنہ کیا۔ اس موقع پر ڈپٹی کمشنر لَیَّہ آصف علی ڈوگر، سی ای او ہیلتھ ڈاکٹر شاہد ریاض اور دیگر متعلقہ افسران بھی ان کے ہمراہ تھے۔
کمشنر نے ہیلتھ کلینک کے مختلف شعبوں کا دورہ کرتے ہوئے طبی سہولیات، ادویات کے اسٹور، مفت ادویات کی دستیابی، ادویات کے اسٹاک و ریکارڈ، مریضوں کے اندراج، عملے کی حاضری، ڈیوٹی انتظامات، صفائی ستھرائی اور سینی ٹیشن کے معیار کا تفصیلی جائزہ لیا۔
اس موقع پر اشفاق احمد چوہدری نے کہا کہ وزیراعلیٰ پنجاب مریم نواز شریف کے ویژن کے مطابق شہریوں کو معیاری، بروقت اور مفت طبی سہولیات کی فراہمی حکومت کی اولین ترجیح ہے۔ انہوں نے کہا کہ پنجاب حکومت صحت کے شعبے کی بہتری اور سرکاری طبی مراکز میں علاج معالجہ کے معیار کو مزید مؤثر بنانے کے لیے عملی اقدامات کر رہی ہے، جبکہ ادویات کی دستیابی اور علاج کے معیار پر کسی قسم کا سمجھوتہ نہیں کیا جائے گا۔
انہوں نے طبی عملے کو ہدایت کی کہ مریضوں کے ساتھ خوش اخلاقی، ذمہ داری اور پیشہ ورانہ انداز میں فرائض انجام دیں، کیونکہ علاج معالجہ میں غفلت، لاپرواہی یا غیر مناسب رویہ کسی صورت برداشت نہیں کیا جائے گا۔
کمشنر نے متعلقہ افسران کو ہدایت کی کہ ہیلتھ کلینک کی پرانی عمارت کا متعلقہ محکمہ سے تکنیکی معائنہ کروا کر اس کی بہتری اور بحالی کے لیے جامع لائحہ عمل مرتب کیا جائے۔
دورے کے دوران سی ای او ہیلتھ ڈاکٹر شاہد ریاض نے ہیلتھ کلینک کی کارکردگی، دستیاب طبی سہولیات اور جاری انتظامات کے حوالے سے کمشنر کو تفصیلی بریفنگ بھی دی۔
