لیہ: کمشنر ڈی جی خان ڈویژن اشفاق احمد چوہدری نے لَیَّہ۔چوبارہ روڈ کی گرین بیلٹ پر مون سون شجرکاری مہم کے تحت پودا لگا کر شجرکاری مہم کا آغاز کیا۔ اس موقع پر ڈپٹی کمشنر لَیَّہ آصف علی ڈوگر بھی ان کے ہمراہ موجود تھے۔
کمشنر اشفاق احمد چوہدری نے اس موقع پر کہا کہ وزیراعلیٰ پنجاب مریم نواز شریف کے گرین پنجاب ویژن کے تحت صوبہ بھر میں شجرکاری کے فروغ، ماحولیاتی تحفظ، سرسبز و شاداب پنجاب کے قیام اور موسمیاتی تبدیلیوں کے منفی اثرات سے نمٹنے کے لیے مؤثر اقدامات کیے جا رہے ہیں۔
انہوں نے کہا کہ مون سون شجرکاری مہم کا مقصد زیادہ سے زیادہ درخت لگا کر ماحول کو بہتر بنانا، فضائی آلودگی میں کمی لانا اور آنے والی نسلوں کے لیے صحت مند ماحول فراہم کرنا ہے۔ ان کا کہنا تھا کہ شجرکاری موسمیاتی تبدیلیوں کے اثرات کم کرنے اور ماحول کو محفوظ بنانے میں کلیدی کردار ادا کرتی ہے۔
کمشنر نے شہریوں پر زور دیا کہ وہ شجرکاری مہم میں بڑھ چڑھ کر حصہ لیں، کیونکہ ایک پودا مستقبل کی محفوظ، سرسبز اور خوشحال نسلوں کی ضمانت ہے۔
انہوں نے متعلقہ محکموں کو ہدایت کی کہ مون سون شجرکاری مہم کے مقررہ اہداف بروقت مکمل کیے جائیں، زیادہ سے زیادہ پودے لگائے جائیں اور ان کی حفاظت و دیکھ بھال کو بھی یقینی بنایا جائے تاکہ گرین پنجاب مہم کے مقاصد کامیابی سے حاصل کیے جا سکیں۔
