کوئٹہ:کوئٹہ کے ایک نجی ہسپتال میں ایک نایاب اور خوشگوار واقعہ پیش آیا، جہاں ایک خاتون نے بیک وقت پانچ بچوں کو جنم دیا۔ ڈاکٹروں کے مطابق ماں اور تمام نومولود بچے خیریت سے ہیں اور انہیں احتیاطاً طبی نگرانی میں رکھا گیا ہے۔
ذرائع کے مطابق خاتون کو پیچیدہ طبی صورتحال کے باعث خصوصی میڈیکل ٹیم کی نگرانی میں رکھا گیا تھا۔ کامیاب ڈیلیوری کے بعد اہل خانہ میں خوشی کی لہر دوڑ گئی اور اس موقع کو اللہ تعالیٰ کی خاص رحمت قرار دیا گیا۔
اہل خانہ کے مطابق والدین کے پہلے سے تین بچے موجود تھے، جبکہ پانچ نومولود بچوں کی آمد کے بعد خاندان میں بچوں کی مجموعی تعدادآٹھ ہو گئی ہے۔
ڈاکٹروں کا کہنا ہے کہ بیک وقت پانچ بچوں کی پیدائش انتہائی نایاب واقعہ ہے، جس کے لیے جدید طبی سہولیات، تجربہ کار ماہرین اور مسلسل نگرانی کی ضرورت ہوتی ہے۔ ماں اور بچوں کی صحت پر مسلسل نظر رکھی جا رہی ہے تاکہ کسی بھی ممکنہ پیچیدگی سے بروقت نمٹا جا سکے۔
واقعے کی خبر سامنے آنے کے بعد سوشل میڈیا پر بھی صارفین کی جانب سے خاندان کو مبارکباد اور نیک تمناؤں کا اظہار کیا جا رہا ہے، جبکہ اس منفرد واقعے کو ایک خوش آئند خبر قرار دیا جا رہا ہے۔
