لَیَّہ: لَیَّہ شہر میں لبِ نیلم سے ریلوے پھاٹک (بہرام روڈ)تک سڑک کے ساتھ گزرنے والے کھال سے نہری پانی سڑک پر پھیل جانے کے باعث شہریوں کو شدید مشکلات کا سامنا ہے، جبکہ ٹریفک کی روانی بھی متاثر ہو رہی ہے۔متعدد شہریوں ،دکانداروںمحمد ریان،سعید احمد ،غلام فرید،سکندر علی،شریف بودلہ ،محمد ارشد،نذیر احمدنے بتایا کہ کھال سے مسلسل پانی سڑک پر آنے کی وجہ سے مختلف مقامات پر پانی جمع ہو چکا ہے، جس سے موٹر سائیکل سواروں، رکشہ ڈرائیوروں اور دیگر گاڑیوں کے پھسلنے اور حادثات کا خطرہ بڑھ گیا ہے۔شہریوں کا کہنا ہے کہ یہ سڑک شہر کی اہم شاہراہوں میں شامل ہے، جہاں روزانہ بڑی تعداد میں شہری آمدورفت کرتے ہیں۔ پانی جمع ہونے کے باعث نہ صرف سفر دشوار ہو گیا ہے بلکہ عوام کو قیمتی وقت کے ضیاع اور حادثات کے خدشات کا بھی سامنا ہے۔متاثرہ شہریوں نے ضلعی انتظامیہ اور متعلقہ محکمہ انہار سے مطالبہ کیا ہے کہ فوری طور پر موقع پر پہنچ کر کھال سے سڑک پر آنے والے پانی کی روک تھام کے لیے مؤثر اقدامات کیے جائیں تاکہ ٹریفک کی روانی بحال ہو اور کسی بھی ممکنہ حادثے سے بچا جا سکے۔
